तासिक प्रार्थना - येशू सांत्वन देतो

प्रत्येक प्रहराची प्रस्तावना

पिता, पुत्र आणि पवित्र आत्म्याच्या नावाने

एकमेव देव, आमेन.

प्रभु, दया कर. प्रभु, दया कर. प्रभु, आशीर्वाद दे. आमेन.

पित्याला, पुत्राला आणि पवित्र आत्म्यास गौरव असो, आता आणि सदैव आणि सर्व युगांच्या युगांपर्यंत, आमेन.

आमचा पिता

¶ ‹म्हणून तुम्ही प्रार्थना करता तेव्हा तुम्ही अशाप्रकारे प्रार्थना करावीः› ‹हे आमच्या स्वर्गातील पित्या, › ‹तुझे नाव पवित्र मानले जावो.›

‹तुझे राज्य येवो, › ‹जसे स्वर्गात› ‹तसे पृथ्वीवरही तुझ्या इच्छेप्रमाणे होवो.›

‹आमची रोजची भाकर आज आम्हास दे.›

‹जशी आम्ही आमच्या ऋण्यांस त्यांची ऋणे सोडली आहेत, › ‹तशीच तू आमची ऋणे आम्हांस सोड.›

‹आणि आम्हास परीक्षेत आणू नकोस› ‹तर आम्हास त्या दुष्टापासून सोडव. (कारण की राज्य, सामर्थ्य आणि गौरवही सर्वकाळ तुझीच आहेत.)›

कृतज्ञतेची प्रार्थना

चांगल्या गोष्टींचा निर्माणकर्ता, दयाळू देव, आमच्या प्रभू व देव व तारणहार येशू ख्रिस्ताचे पिता, याचे आपण आभार मानूया; कारण त्याने आम्हांला आच्छादले, सहाय्य केले, राखले, आम्हांला स्वतःकडे स्वीकृत केले, आमच्यावर दया केली, आधार दिला, आणि आम्हांला या क्षणी आणले. हाच तो आहे; म्हणून आपण त्याच्याकडे विनवूया की, तो आम्हांला हा पवित्र दिवस आणि आमच्या आयुष्याचे सर्व दिवस आपल्या शांततेत राखो. सर्वशक्तिमान प्रभु, आमचा देव.

हे स्वामी देव, सर्वशक्तिमान, आमच्या प्रभू व देव व तारणहार येशू ख्रिस्ताचे पिता, आम्ही तुला सर्वकाळ, सर्व कारणांसाठी आणि सर्व स्थितींमध्ये धन्यवाद देतो; कारण तू आम्हांला आच्छादलेस, सहाय्य केलेस, राखलेस, आम्हांला स्वतःकडे स्वीकृत केलेस, आमच्यावर दया केलीस, आधार दिलास, आणि आम्हांला या क्षणी आणलेस.

याकरिता, हे मानवजातीवर प्रेम करणाऱ्या, तुझ्या कृपाळूपणापासून आम्ही मागतो आणि विनवतो: आम्हांला हा पवित्र दिवस आणि आमच्या आयुष्याचे सर्व दिवस तुझ्या भयासह संपूर्ण शांततेत पूर्ण करता येऊ दे. सर्व मत्सर, सर्व परीक्षा, आणि सैतानाचे सर्व कृत्य, आणि दुष्ट मनुष्यांची कटकारस्थाने, तसेच गुप्त व उघडे शत्रूंची उभारणी — हे सर्व आमच्यापासून, तुझ्या सर्व लोकांपासून, आणि या पवित्र स्थळापासून दूर कर. आणि जे चांगले व उपयुक्त आहे ते आम्हांला प्रदान कर; कारण तूच आम्हांला सर्प व विंचू आणि शत्रूच्या सर्व शक्तीवर तुडविण्याचा अधिकार दिलास. आम्हांला परीक्षेत नेऊ नकोस; पण दुष्टापासून सोडव.

तुझ्या एकुलत्या पुत्रा, आमच्या प्रभू व देव व तारणहार येशू ख्रिस्ताच्या कृपा, दया आणि मानवप्रेमामुळे. ज्याच्याद्वारे तुला, त्याच्याबरोबर आणि जीवनदायी तुझ्या तुल्य असणाऱ्या पवित्र आत्म्यासह, आता आणि सदैव आणि सर्व युगांच्या युगांपर्यंत गौरव, मान, सामर्थ्य आणि वंदना उचित आहे, आमेन.

स्तोत्र 50

थोर परमेश्वर देव, बोलला आहे. आणि पृथ्वीला तिच्या उगवतीपासून मावळतीपर्यंत हाक मारली.

सौंदर्य परिपूर्णता सियोनेमधून देव प्रकाशला आहे.

आमचा देव येईल आणि तो शांत राहणार नाही, त्याच्यासमोर आग नाश करत चालली आहे, आणि त्याच्याभोवती वादळ घोंगावत आहे.

त्याने वर आकाशाला आणि पृथ्वीला हाक मारली, म्हणजे तो त्याच्या लोकांचा न्यायनिवाडा करील.

देव म्हणतो, “माझ्या भक्तांनो माझ्याभोवती गोळा व्हा. ज्यांनी यज्ञाच्या व्दारे माझ्याशी करार केला आहे.”

आकाश त्याच्या चांगुलपणाविषयी सांगत असते. कारण देव स्वतः न्यायधीश आहे.

हे माझ्या लोकांनो, ऐका, आणि मी बोलेन, मी देव आहे, तुमचा देव आहे.

मी तुमच्या होमार्पणाबद्दल तक्रार करीत नाही. तुमची होमार्पणे निरंतर माझ्यापुढे आहेत,

मी तुमच्या गोठ्यातून बैल घेणार नाही. किंवा मी तुमच्या मेंढवाड्यातून बोकड घेणार नाही.

कारण जंगलातील प्रत्येक पशू माझा आहे, हजारो पर्वतावरील सर्व प्राणी माझ्याच मालकीचे आहेत.

उंच पर्वतावरील प्रत्येक पक्षी मला माहित आहे आणि भूमीवरील वन्य पशू माझे आहेत.

मी भुकेला असलो तरी तुला बोलणार नाही, कारण जग माझेच आहे, आणि त्यातील सर्वकाही माझेच आहे.

मी बैलाचे मांस खाणार का? मी बकऱ्यांचे रक्त पिणार का?

देवाला उपकार स्तुतीचा यज्ञ अर्पण कर, आणि परत्पराकडे आपले नवस फेड.

तू संकटात असता मला हाक मार, आणि मी तुला वाचवेन, आणि तू मला गौरव देशील.

देव दुष्ट लोकांस म्हणतो, तुम्ही लोक माझ्या कायद्यांबद्दल बोलण्याचे काय काम आहे? आणि तू माझा करार तुझ्या तोंडाने उच्चरणारा आहेस?

कारण तू शिक्षेचा तिरस्कार करतोस, आणि माझी वचने झुगारून देतोस?

तुम्ही चोराला बघता आणि त्याच्याबरोबर सहमत होता. तुम्ही व्यभिचार करणाऱ्या लोकांबरोबर सहभागी होता.

तू वाईटाला आपले मुख देतोस, आणि तुझी जीभ कपट व्यक्त करते.

तुम्ही बसता आणि आपल्या भावाविरूद्ध बोलता. तू आपल्या सख्या भावाची निंदा करतोस.

तुम्ही वाईट गोष्टी करता आणि तरीही मी गप्प राहिलो. मी तुझ्यासारखा आहे असे तुला वाटले, परंतू मी तुझा निषेध करणार आणि तुझ्या डोळ्यापुढे ओळीने सर्वकाही मांडणार.

तुम्ही लोक देवाला विसरला आहात. मी तुम्हास फाडून टाकण्यापूर्वीच तुम्ही हे सारे लक्षात घ्या जर तसे घडले तर तुम्हास कोणीही वाचवू शकणार नाही.

जो कोणी उपकारस्तुतीचा यज्ञ अर्पितो, आणि जो कोणी आपला मार्ग सरळ योजितो, त्यास मी देवाचे तारण दाखवेन.

प्रार्थनेची सुरुवात

धन्य दिवसाच्या सहाव्या प्रहराची स्तुति, मी ती माझ्या राजा व देव ख्रिस्ताला अर्पितो, आणि तो माझी पापे क्षमा करो अशी विनंति करतो.

स्तोत्र 53

मूर्ख आपल्या मनात म्हणतो, तेथे देव नाही. ते भ्रष्टाचारी आहेत आणि त्यांनी तिरस्करणीय अन्यायाचे कृत्य केले आहे; त्यातल्या कोणीही चांगले कृत्य केले नाही.

देव स्वर्गातून मानवजातीच्या मुलांकडे पाहतो की, जर तेथे कोणी समजदार आहे, आणि जो देवाचा शोध घेतो.

त्यातील प्रत्येकजण माघारी गेला आहे; सर्व भ्रष्ट झाले आहेत; त्यातल्या एकानेही चांगले कृत्य केले नाही, एकानेही नाही.

ज्यांनी अन्याय केला, त्यांना काहीही माहित नव्हते काय? ज्यांनी माझ्या लोकांस भाकरीप्रमाणे खाल्ले, पण ते देवाला हाक मारत नाही.

तेथे भिण्याचे काही कारण नव्हते, तरी ते मोठ्या भयात होते; कारण तुझ्याविरूद्ध तळ देणाऱ्यांची देवाने हाडे विखुरली आहेत; असे लोक लज्जित झाले आहेत कारण देवाने त्यांना नाकारले आहे.

अहो, सियोनातून इस्राएलाचे तारण येवो! जेव्हा देव आपल्या लोकांस बंदिवासातून परत आणील, तेव्हा याकोब आनंद करेल आणि इस्राएल हर्षित होईल!

स्तोत्र 56

हे देवा, माझ्यावर दया कर, कारण कोणीतरी मला गिळून टाकण्याची इच्छा करतो; दिवसभर तो माझ्याशी लढतो आणि अत्याचार करतो.

माझे शत्रू दिवसभर मला गिळून टाकण्याची इच्छा करतात; कारण उद्धटपणे माझ्याविरूद्ध लढणारे अनेक आहेत.

मी जेव्हा घाबरतो, तेव्हा मी तुझ्यावर भरंवसा ठेवीन.

मी देवाच्या मदतीने, त्याच्या वचनाची स्तुती करीन, मी देवावर भरवसा ठेवला आहे; मी भिणार नाही. मनुष्य माझे काय करील?

दिवसभर ते माझ्या शब्दांचा विपरित अर्थ करतात; त्यांचे सर्व विचार माझ्याविरूद्ध माझ्या वाईटासाठी असतात.

ते एकत्र जमतात, ते लपतात आणि माझ्या पावलावर लक्ष ठेवतात, जसे ते माझा जीव घेण्यासाठी वाट पाहतात.

त्यांना अन्याय करण्यापासून निसटून जाऊ देऊ नको. हे देवा, तुझ्या क्रोधाने त्यांना खाली आण.

तू माझ्या भटकण्याची ठिकाणे मोजली आहेत आणि माझे अश्रू आपल्या बाटलित ठेवली आहेत; तुझ्या पुस्तकात त्याची नोंद नाही का?

मी तुला हाक मारीन त्यादिवशी माझे शत्रू मागे फिरतील; हे मला माहित आहे, देव माझ्या बाजूचा आहे.

मी देवाच्या साहाय्याने त्याच्या वचनाची स्तुती करीन. मी परमेश्वराच्या साहाय्याने त्याच्या वचनाची स्तुती करीन.

मी देवावर भरंवसा ठेवीन; मी भिणार नाही; मनुष्य माझे काय करील?

हे देवा, तुझे नवस पूर्ण करण्याचे कर्तव्य माझ्यावर आहे; मी तुला धन्यवादाची अर्पणे देईन.

कारण तू माझे जीवन मृत्यूपासून सोडवले आहे; तू माझे पाय पडण्यापासून राखले, यासाठी की, मी जीवनाच्या प्रकाशात देवापुढे चालावे.

स्तोत्र 60

हे देवा, तू आम्हास टाकून दिले आहेस; तू आम्हास फाडून खाली टाकले आहे; आमच्यावर रागावला आहेस; तू आम्हांस पुन्हा पूर्वस्थितीवर आण.

तू भूमी कंपित केली आहेस; तू ती फाडून वेगळी केली; तिचे खिंडार बरे कर, कारण ती हादरत आहे.

तू तुझ्या लोकांस कठीण गोष्टी दाखवल्या आहेत; तू आम्हास झिंगवण्यास लावणारा द्राक्षरस पाजला आहे.

तुझा आदर करणाऱ्यास तू निशाण दिले आहे, यासाठी की, त्यांनी सत्याकरता तो उभारावा.

ज्यांच्यावर तू प्रेम करतो त्यांची सुटका व्हावी, म्हणून तुझ्या उजव्या हाताने आमची सुटका कर आणि आम्हास उत्तर दे.

देव आपल्या पवित्रतेला अनुसरून म्हणाला, मी जल्लोष करीन; मी शखेमाची वाटणी करीन आणि सुक्कोथाचे खोरे मोजून देईन.

गिलाद माझा आहे आणि मनश्शे माझा आहे; एफ्राईमही माझे शिरस्त्राण आहे; यहूदा माझा राजदंड आहे.

मवाब माझे धुण्याचे पात्र आहे; अदोमावर मी माझे पादत्राण फेकीन; मी आनंदाने पलिष्ट्यावर विजयाने आरोळी मारीन.

मला बळकट नगरात कोण नेईल? मला अदोमात कोण नेईल?

हे देवा, तू आम्हास नाकारले नाही? परंतु तू आमच्या सैन्याबरोबर लढाईत गेला नाहीस.

तू आमच्या शत्रूविरूद्ध आम्हास मदत कर, कारण मनुष्याचे सहाय्य निष्फळ आहे.

आम्ही देवाच्या मदतीने विजयी होऊ; तो आमच्या शत्रूला आपल्या पायाखाली तुडविल.

स्तोत्र 62

माझा जीव निशब्द होऊन केवळ देवाची प्रतिक्षा करत आहे; त्याच्यापासून माझे तारण येते.

तोच केवळ माझा खडक आणि माझे तारण आहे; तो माझा उंच बुरूज आहे; मी कधीही ढळणार नाही.

झुकलेल्या भिंतीसारख्या, कोसळलेल्या कुंपणासारखा झालेल्या, एका मनुष्यास मारण्यासाठी तुम्ही सर्वजण किती काळपर्यंत त्याच्यावर हल्ला करून याल?

त्याच्या उच्च पदापासून त्यास खाली आणण्यासाठी मात्र ते सल्ला घेतात; त्यांना लबाड बोलण्यास आवडते; ते आपल्या मुखाने आशीर्वाद देतात, पण त्यांच्या अंतःकरणातून शाप देतात.

हे माझ्या जिवा, तू केवळ देवासाठी निशब्द राहून प्रतिक्षा कर; कारण माझी आशा त्याच्यावर लागली आहे.

तोच केवळ माझा खडक आणि तारण आहे; तो माझा उंच बुरूज आहे; मी ढळणार नाही.

माझे तारण आणि माझे गौरव देवावर अवलंबून आहे; माझ्या सामर्थ्याचा खडक आणि माझा आश्रय देवच आहे.

अहो लोकहो, सर्वदा त्याच्यावर भरवसा ठेवा; त्याच्यापुढे आपले अंतःकरण मोकळे करा; देव आमच्यासाठी आश्रय आहे.

खरोखर नीच माणसे निरर्थक आहेत, आणि उच्च माणसे लबाड आहेत; वजन केले असता हलके भरतील; त्यांना मापले असता ते केवळ मिथ्या आहेत.

दडपशाहीवर आणि चोरीवर भरवसा ठेवू नका; आणि संपत्तित निरुपयोगी आशा ठेवू नका;

देव एकदा बोलला आहे, मी दोनदा ऐकले आहे, सामर्थ्य देवाचे आहे.

हे प्रभू, तुझ्या ठायी प्रेमदया आहे. कारण प्रत्येक मनुष्यास त्याने जसे केले आहे त्याप्रमाणे तू प्रतिफळ देतोस.

स्तोत्र 66

अहो पृथ्वीवरील सर्वजणहो देवाचा जयजयकार करा;

त्याच्या नावाचा महिमा गा; त्याची स्तुती गौरवशाली होईल अशी करा.

देवाला म्हणा, तुझी कृत्ये किती भीतिदायक आहेत, तुझ्या महान सामर्थ्यामुळे तुझे शत्रू तुझ्या स्वाधीन होतात.

सर्व पृथ्वी तुझी आराधना करतील; आणि तुझी स्तोत्रे गातील; ते तुझ्या नावाची स्तोत्रे गातील.

अहो या, आणि देवाची कार्ये पहा; तो मनुष्यांच्या मुलांस आपल्या कृत्यांनी धाक बसवतो.

त्याने समुद्र पालटून कोरडी भूमी केली; ते नदीतून पायांनी चालत गेले; तेथे आम्ही त्याच्यात आनंद केला.

तो आपल्या सामर्थ्याने सर्वकाळ राज्य करतो; तो आपल्या डोळ्यांनी सर्व राष्ट्रांचे निरीक्षण करतो; बंडखोरांनी आपल्यास उंच करू नये.

अहो लोकांनो, आमच्या देवाला धन्यवाद द्या, आणि त्याची स्तुती ऐकू येईल अशी करा.

तो आमचा जीव राखून ठेवतो, आणि तो आमचे पाय सरकू देत नाही.

कारण हे देवा, तू आमची परीक्षा केली आहे; रुप्याची परीक्षा करतात तशी तू आमची परीक्षा केली आहे.

तू आम्हास जाळ्यात आणले; तू आमच्या कमरेवर अवजड ओझे ठेवले.

तू आमच्या डोक्यावरून लोकांस स्वारी करण्यास लावले. आम्ही अग्नीतून आणि पाण्यातून गेलो, परंतु तू आम्हास बाहेर काढून प्रशस्त जागी आणले.

मी होमार्पणे घेऊन तुझ्या घरात येईन; मी तुला केलेले नवस फेडीन.

संकटात असता जे मी आपल्या ओठांनी उच्चारले आणि जे मी आपल्या तोंडाने बोलल,

मी तुला मेंढ्याच्या धूपासहित पुष्ट पशूंचे होमार्पणे मी तुला अर्पीण; बोकड आणि गोऱ्हे अर्पीण.

जे सर्व तुम्ही देवाचे भय धरता, या आणि ऐका, आणि त्याने माझ्यासाठी काय केले ते मी तुम्हास सांगतो.

मी माझ्या मुखाने त्याचा धावा केला, आणि माझ्या जीभेवर त्याची स्तुती होती.

जर माझ्या मनात अन्यायाकडे मी पाहिले असते, तर प्रभूने माझे ऐकले नसते.

पण देवाने खचित ऐकले आहे; त्याने माझ्या प्रार्थनेच्या वाणीकडे लक्ष दिले आहे.

देवाचा धन्यवाद होवो, त्याने माझ्या प्रार्थनांपासून आपले मुख फिरविले नाही, किंवा त्याच्या कराराच्या विश्वासूपणापासून आपली दृष्टी वळविली नाही.

स्तोत्र 69

हे देवा, मला तार; कारण पाणी माझ्या गळ्याशी येऊन पोहचले आहे.

मी खोल चिखलात बुडत आहे, तेथे मला उभे राहण्यास ठिकाण नाही; मी खोल पाण्यात आलो आहे, तेथे पुराचे पाणी माझ्यावरून वाहत आहे.

माझ्या रडण्याने मी थकलो आहे; माझा घसा कोरडा पडला आहे; माझ्या देवाची वाट पाहता माझे डोळे शिणले आहेत.

विनाकारण माझा द्वेष करणारे माझ्या डोक्यावरील केसांपेक्षाही अधिक आहेत; जे अन्यायाने माझे वैरी असून मला कापून काढायला पाहतात ते बलवान आहेत; जे मी चोरले नव्हते, ते मला परत करावे लागले.

हे देवा, तू माझा मूर्खापणा जाणतो, आणि माझी पापे तुझ्यापासून लपली नाहीत.

हे प्रभू, सेनाधीश परमेश्वरा, जे तुझी प्रतिक्षा करतात, त्यांच्या फजितीला मी कारण होऊ नये. हे इस्राएलाच्या देवा, जे तुला शोधतात त्यांच्या अप्रतिष्ठेला मी कारण होऊ नये.

कारण तुझ्याकरता मी निंदा सहन केली आहे; लाजेने माझे तोंड झाकले आहे.

मी आपल्या बंधूला परका झालो आहे, आपल्या आईच्या मुलांस विदेशी झालो आहे.

कारण तुझ्या मंदीराविषयीच्या आवेशाने मला खाऊन टाकले आहे, आणि तुझी निंदा करणाऱ्यांनी केलेल्या निंदा माझ्यावर पडल्या आहेत.

जेव्हा मी रडलो आणि उपवास करून माझ्या जिवाला शिक्षा केली, तेव्हा ते जसे माझ्या स्वतःची निंदा होती.

जेव्हा मी गोणपाट आपले वस्र केले, तेव्हा मी त्यांना उपहास असा झालो.

जे नगराच्या वेशीत बसतात; ते माझी निंदा करतात; मी मद्यप्यांचा गीत झालो.

पण मी तर हे परमेश्वरा, माझी प्रार्थना तू, स्वीकारशील अशा वेळेला करतो; हे देवा, तू आपल्या विपुल दयेस अनुसरून व आपल्या तारणाच्या सत्यास अनुसरून मला उत्तर दे.

मला चिखलातून बाहेर काढ, आणि त्यामध्ये मला बुडू देऊ नकोस; माझा तिरस्कार करणाऱ्यापासून मला वाचव. खोल पाण्यापासून मला काढ.

पुराच्या पाण्याने मला पूर्ण झाकून टाकू नकोस, खोल डोह मला न गिळो. खाच आपले तोंड माझ्यावर बंद न करो.

हे परमेश्वरा, मला उत्तर दे, कारण तुझ्या कराराची विश्वसनियता उत्तम आहे.

आपल्या सेवकापासून आपले तोंड लपवू नकोस, कारण मी क्लेशात आहे; मला त्वरीत उत्तर दे.

माझ्या जिवाजवळ ये आणि त्यास खंडून घे; माझ्या शत्रूंमुळे खंडणी भरून मला सोडव.

तुला माझी निंदा, माझी लाज आणि माझी अप्रतिष्ठा माहित आहे; माझे विरोधक माझ्यापुढे आहेत;

निंदेने माझे हृदय तुटले आहे; मी उदासपणाने भरलो आहे; माझी कीव करणारा कोणीतरी आहे का हे मी पाहिले, पण तेथे कोणीच नव्हता; मी सांत्वनासाठी पाहिले, पण मला कोणी सापडला नाही.

त्यांनी मला खाण्यासाठी विष दिले; मला तहान लागली असता आंब दिली

त्यांचे मेज त्यांच्यापुढे पाश होवोत; जेव्हा ते सुरक्षित आहेत असा विचार करतील, तो त्यांना सापळा होवो.

त्यांचे डोळे आंधळे होवोत यासाठी की, त्यांना काही दिसू नये; आणि त्यांची कंबर नेहमी थरथर कापावी असे कर.

तू त्यांच्यावर आपला संताप ओत, आणि तुझ्या संतापाची तीव्रता त्यांना गाठो.

त्यांची ठिकाणे ओसाड पडो; त्यांच्या तंबूत कोणीही न राहो.

कारण ज्याला तू दणका दिला त्याचा ते छळ करतात; तू ज्यांस जखमी केलेस त्यांच्या वेदनेविषयी ते दुसऱ्याला सांगतात.

ते अन्यायानंतर अन्याय करतात त्यांना दोष लाव; तुझ्या न्यायाच्या विजयात त्यांना येऊ देऊ नको.

जीवनाच्या पुस्तकातून त्यांची नावे खोडली जावोत, आणि नितिमानांबरोबर त्यांची नावे लिहिली न जावोत.

पण मी गरीब आणि दु:खी आहे; हे देवा, तुझे तारण मला उंचावर नेवो.

मी देवाच्या नावाची स्तुती गाणे गाऊन करीन, आणि धन्यवाद देऊन त्यास उंचाविन.

ते बैलापेक्षा, शिंगे असलेल्या, किंवा दुभागलेल्या खुराच्या गोऱ्ह्यांपेक्षा परमेश्वरास आवडेल.

लीनांनी हे पाहिले आहे आणि हर्षित झाले; जे देवाचा शोध घेतात त्या तुमचे हृदय जिवंत होवो.

कारण परमेश्वर गरजवंताचे ऐकतो आणि आपल्या बंदिवानांचा तिरस्कार करत नाही.

आकाश, पृथ्वी, समुद्र आणि त्यामध्ये संचार करणारे प्रत्येकगोष्ट त्याची स्तुती करा.

कारण देव सियोनेला तारील आणि यहूदाची नगरे पुन्हा बांधील; लोक तेथे राहतील आणि ते त्यांच्या मालकीचे होईल.

त्याच्या सेवकाचे वंशजही ते वतन करून घेतील; आणि ज्यांना त्याचे नाव प्रिय आहे ते तेथे राहतील.

स्तोत्र 83

हे देवा, गप्प राहू नकोस. हे देवा, आमच्याकडे दुर्लक्ष करू नको आणि स्वस्थ राहू नकोस.

पाहा, तुझे शत्रू गलबला करीत आहेत, आणि जे तुझा द्वेष करतात त्यांनी आपले डोके उंच केले आहे.

ते तुझ्या लोकांविरूद्ध गुप्त योजना आखतात. आणि ते एकत्र मिळून तुझ्या आश्रितांविरूद्ध योजना करतात.

ते म्हणतात, “या आणि आपण त्यांचा एक राष्ट्र म्हणून नाश करू. यानंतर इस्राएलाचे नावही आणखी आठवणित राहणार नाही.

त्यांनी एकमताने, एकत्र मिळून मसलत केली आहे, ते तुझ्याविरूद्ध करार करतात.

ते तंबूत राहणारे अदोमी आणि इश्माएली, मवाब आणि हगारी,

गबाल, अम्मोन व अमालेकचे, पलिष्टी आणि सोरकर हे ते आहेत.

अश्शूरानेही त्यांच्याशी करार केला आहे; ते लोटाच्या वंशजांना मदत करीत आहेत.

तू जसे मिद्यानाला, सीसरा व याबीन यांना किशोन नदीजवळ केलेस तसेच तू त्यांना कर.

ते एन-दोर येथे नष्ट झाले, आणि ते भूमीला खत झाले.

तू ओरेब व जेब यांच्यासारखे त्यांच्या उमरावांना कर, जेबह व सलमुन्ना यांच्यासारखे त्यांच्या सर्व सरदारांचे कर.

ते म्हणाले, देवाची निवासस्थाने आपण आपल्या ताब्यात घेऊ.

हे माझ्या देवा, तू त्यांना वावटळीच्या धुरळ्यासारखे, वाऱ्यापुढील भुसासारखे तू त्यांना कर.

अग्नी जसा वनाला जाळतो, व ज्वाला जशी डोंगराला पेटवते.

तसा तू आपल्या वादळाने त्यांचा पाठलाग कर, आणि आपल्या तुफानाने त्यांना घाबरून सोड.

हे परमेश्वरा, त्यांची चेहरे लज्जेने भर यासाठी की, त्यांनी तुझ्या नावाचा शोध करावा.

ते सदासर्वकाळ लज्जित व घाबरे होवोत; ते लज्जित होऊन नष्ट होवोत.

नंतर तू, मात्र तूच परमेश्वर, या नावाने सर्व पृथ्वीवर परात्पर आहेस असे त्यांना कळेल.

स्तोत्र 84

हे सेनाधीश परमेश्वरा, तू जेथे राहतो ती जागा किती लावण्यपूर्ण आहे.

माझ्या जिवाला परमेश्वराच्या अंगणाची खूप आतुरता लागली, असून तो अतिउत्सुकही झाला आहे; माझा जीव व देह जिवंत देवाला आरोळी मारीत आहे.

हे सेनाधीश परमेश्वरा, माझ्या राजा, माझ्या देवा, तुझ्या वेद्यांजवळ चिमणीला आपले घर आणि निळवीला आपली पिल्ले ठेवण्यासाठी कोटे सापडले आहे.

जे तुझ्या घरात राहतात ते आशीर्वादित आहेत; ते निरंतर तुझी स्तुती करीत राहतील.

ज्या मनुष्याचे सामर्थ्य तुझ्यात आहे, ज्याच्या मनात सीयोनेचे राजमार्ग आहेत तो आशीर्वादित आहे.

शोकाच्या खोऱ्यातून जाताना, त्यांना पिण्याच्या पाण्याचे झरे सापडतात. आगोटीचा पाऊस त्यांना पाण्याच्या तलावाने झाकतो.

ते सामर्थ्यापासून सामर्थ्यात जातात; त्यातील प्रत्येकजणाला सियोनेत देवाचे दर्शन लाभते.

हे सेनाधीश परमेश्वरा, माझी प्रार्थना ऐक; याकोबाच्या देवा, मी जे सांगतो ते माझे ऐक.

हे देवा, तू आमची ढाल आहेस; अवलोकन कर, तू आपल्या अभिषिक्ताच्या मुखाकडे दृष्टी लाव.

तुझ्या अंगणातला एक दिवस इतर ठिकाणातल्या हजार दिवसांपेक्षा उत्तम आहे; दुष्टाईच्या तंबूत राहण्यापेक्षा माझ्या देवाच्या घराचा द्वारपाळ होणे हे मला चांगले आहे.

कारण परमेश्वर देव आमचा सूर्य आणि ढाल आहे; परमेश्वर अनुग्रह आणि गौरव देतो; जे प्रामाणिकपणे चालतात त्यांना उत्तम ते दिल्यावाचून तो राहणार नाही.

हे सेनाधीश परमेश्वरा, जो मनुष्य तुझ्यावर भरवसा ठेवतो तो आशीर्वादित आहे.

स्तोत्र 85

हे परमेश्वरा, तू आपल्या देशावर अनुग्रह दाखवला आहेस; तू याकोबाला बंदिवासातून परत आणले आहेस.

तू आपल्या लोकांच्या पापांची क्षमा केली आहेस. तू त्यांची सर्व पापे झाकून टाकली आहेत.

तू आपला सर्व क्रोध काढून घेतला आहे; आणि आमच्यावरील भयंकर क्रोधापासून मागे फिरला आहेस.

हे आमच्या तारणाऱ्या देवा, आम्हास परत आण, आणि आमच्यावरचा तुझा असंतोष दूर कर.

सर्वकाळपर्यंत तू आमच्यावर रागावलेला राहशील का? पिढ्यानपिढ्या तू रागावलेला राहशील काय?

तुझ्या लोकांनी तुझ्याठायी आनंद करावा, म्हणून तू आम्हास परत जिवंत करणार नाहीस का?

हे परमेश्वरा, तुझ्या दयेचा अनुभव आम्हास येऊ दे; तू कबूल केलेले तारण आम्हास दे.

परमेश्वर देव काय म्हणेल ते मी ऐकून घेईन. कारण तो आपल्या लोकांशी व विश्वासू अनुयायींशी शांती करेल, तरी मात्र त्यांनी मूर्खाच्या मार्गाकडे पुन्हा वळू नये.

खचित जे त्यास भितात त्यांच्याजवळ त्याचे तारण आहे; यासाठी आमच्या देशात वैभव रहावे.

दया व सत्य एकत्र मिळाली आहेत; निती आणि शांती यांनी एकमेकांचे चुंबन घेतले आहे.

पृथ्वीतून सत्य बाहेर पडत आहे, आणि स्वर्गातून नितिमत्व खाली पाहत आहे.

जे उत्तम ते परमेश्वर देईल, आणि आमची भूमी आपले पिक देईल.

त्याच्यासमोर नितीमत्व चालेल, आणि त्याच्या पावलांसाठी मार्ग तयार करील.

स्तोत्र 86

हे परमेश्वरा, माझे ऐक, आणि मला उत्तर दे, कारण मी दीन आणि दरिद्री आहे.

माझे रक्षण कर, कारण मी तुझा निष्ठावंत आहे; हे माझ्या देवा, तुझ्यावर विश्वास ठेवणाऱ्या सेवकाचे रक्षण कर.

हे प्रभू, माझ्यावर दया कर, कारण मी दिवसभर तुला हाक मारतो.

हे प्रभू, आपल्या सेवकाचा जीव आनंदित कर, कारण मी आपला जीव वर तुझ्याकडे लावतो.

हे प्रभू, तू उत्तम आहेस आणि क्षमा करण्यास तयार आहेस, आणि जे सर्व तुला हाक मारतात त्यांना तू महान दया दाखवतोस.

हे परमेश्वरा, माझ्या प्रार्थनेला कान दे; माझ्या काकुळतीच्या वाणीकडे लक्ष दे.

हे परमेश्वरा, मी आपल्या संकटाच्या दिवसात तुला हाक मारीन, कारण तू मला उत्तर देशील.

हे प्रभू, देवांमध्ये तुझ्याशी तुलना करता येईल असा कोणीही नाही. तुझ्या कृत्यासारखी कोणीतीही कृत्ये नाहीत.

हे प्रभू, तू निर्माण केलेली सर्व राष्ट्रे येतील आणि तुझ्यापुढे नमन करतील. ते तुझ्या नावाला आदर देतील.

कारण तू महान आहेस व तू आश्चर्यकारक गोष्टी करतोस; तूच फक्त देव आहेस.

हे परमेश्वरा, मला तुझे मार्ग शिकव, मग मी तुझ्या सत्यात चालेन. तुझ्या नावाचे भय धरण्यास माझे चित्त एकाग्र कर.

हे प्रभू, माझ्या देवा, मी अगदी आपल्या मनापासून तुझी स्तुती करीन; मी सर्वकाळ तुझ्या नावाचे गौरव करीन.

कारण माझ्यावर तुझी महान दया आहे; तू माझा जीव मृत्यूलोकापासून सोडवला आहेस.

हे देवा, उद्धट लोक माझ्याविरूद्ध उठले आहेत. हिंसाचारी लोकांची टोळी माझा जीव घेण्यास पाहत आहे. त्यांना तुझ्यासाठी काही आदर नाही.

तरी हे प्रभू, तू दयाळू आणि कृपाळू देव आहेस. मंदक्रोध, आणि दया व सत्य यामध्ये विपुल आहेस.

तू माझ्याकडे वळून माझ्यावर कृपा कर; तू आपल्या दासास आपले सामर्थ्य दे; आपल्या दासीच्या मुलाचे तारण कर.

हे परमेश्वरा, तुझ्या अनुग्रहाचे चिन्ह दाखव. कारण तू माझे साहाय्य व सांत्वन केले आहे. मग माझा द्वेष करणाऱ्यांनी ते पाहावे, आणि लज्जित व्हावे.

स्तोत्र 90

हे प्रभू, तू सर्व पिढ्यानपिढ्या आमचे निवासस्थान आहेस.

पर्वत अस्तित्वात येण्यापूर्वी किंवा पृथ्वी व जग निर्माण होण्याआधीच, अनादिकाळापासून ते अनंतकाळापर्यंत तूच देव आहेस.

तू मनुष्यास पुन्हा मातीस मिळवतोस, आणि तू म्हणतोस, “अहो मनुष्याच्या वंशजांनो परत या.”

कारण हजारो वर्षे तुझ्या दृष्टीने, कालच्या गेलेल्या दिवसासारखी, रात्रीच्या प्रहरासारखी आहेत.

पुराप्रमाणे तू त्यांना झाडून दूर नेतोस आणि ते निद्रेप्रमाणे क्षणिक आहेत, सकाळी उगवणाऱ्या गवतासारखे ते आहेत.

सकाळी ते उगवते आणि वाढते; संध्याकाळी ते निस्तेज होते व वाळून जाते.

खरोखर, आम्ही तुझ्या रागाने नष्ट होतो, आणि तुझ्या कोपाने आम्ही घाबरून जातो.

तू आमचे अपराध आपल्यापुढे ठेवले आहेत. आमचे गुप्त पाप तुझ्या प्रकाशाच्या समक्ष ठेवले आहे.

तुझ्या क्रोधाखालून आमचे आयुष्य निघून जाते; आमची वर्षे उसाशाप्रमाणे त्वरेने संपून जातात.

आमचे आयुष्य सत्तर वर्षे आहे; किंवा जर आम्ही निरोगी असलो तर ऐंशी वर्षे आहे; पण तरी आमच्या आयुष्यातील उत्तम वर्षे समस्या आणि दु:ख यांच्या निशाणीने भरलेले आहे. होय, ते लवकर सरते आणि आम्ही दूर उडून जातो.

तुझ्या क्रोधाची तीव्रता कोणाला माहित आहे; तुझी भिती बाळगण्याइतका तुझा क्रोध कोण जाणतो?

म्हणून आम्हास आमचे आयुष्य असे मोजण्यास शिकव की आम्ही ज्ञानाने जगण्यास शिकू.

हे परमेश्वरा, परत फीर, किती वेळ तू उशीर करशील? तुझ्या सेवकावर दया कर.

तू आपल्या दयेने आम्हास सकाळी तृप्त कर म्हणजे आम्ही आपले सर्व दिवस हर्षाने आणि आनंदाने घालवू.

जितके दिवस तू आम्हास पीडले त्या दिवसाच्या मानाने आणि जितकी वर्षे आम्ही समस्येचा अनुभव घेतला त्या वर्षाच्या मानाने आम्हांला आनंदित कर.

तुझी कृती तुझ्या सेवकांना, तुझे वैभव त्यांच्या मुलांना बघू दे.

प्रभू, आमचा देव याची कृपा आम्हांवर असो. आमच्या हातच्या कामाला उन्नती दे; खरोखर, आमच्या हातच्या कामाला उन्नती दे.

स्तोत्र 92

परमेश्वराची उपकारस्तुती करणे आणि हे परात्परा, तुझ्या नावाला स्तुती गाणे ही चांगली गोष्ट आहे.

सकाळी तुझे वात्सल्य, आणि प्रत्येकरात्री तुझ्या सत्यतेबद्दल निवेदन करणे.

दहा तारांचे वाद्य, वीणेवर आणि सतारीवर संगीत वाजवणे चांगले आहे.

कारण हे परमेश्वरा, तू आपल्या कृतीने मला हर्षित केले आहे. तुझ्या हातच्या कृत्यांविषयी मी आनंदाने गाईन.

हे परमेश्वरा, तुझी कृत्ये किती महान आहेत, तुझे विचार फार गहन आहेत.

पशुतुल्य मनुष्यास ते कळत नाहीत, किंवा मूर्खाला ती समजत नाहीत,

दुष्ट गवताप्रमाणे उगवले, आणि सर्व वाईट करणारे भरभराटीस आले; तरीही त्यांचा कायमचा शेवटचा नाश ठरलेला आहे.

परंतु हे परमेश्वरा, तू तर सदासर्वकाळ राज्य करशील.

हे परमेश्वरा, खरोखर, तुझ्या शत्रूंकडे पाहा; सर्व वाईट करणारे विखरले आहेत.

पण तू माझे शिंग रानबैलाच्या शिंगाप्रमाणे उंच केले आहेस; मला ताज्या तेलाचा अभिषेक झाला आहे.

माझ्या डोळ्यांनी माझ्या शत्रूंचा नाश पाहिला आहे; जे दुष्कर्मी माझ्यावर उठतात त्यांच्याविषयी माझ्या कानांनी ऐकले आहे.

नितीमान खजुरीसारखा समृद्ध होईल, तो लबानोनावरील गंधसरूसारखा वाढेल.

जे परमेश्वराच्या घरात लावलेल्या वृक्षासारखे आहेत; ते आपल्या देवाच्या अंगणात झपाट्याने वाढतील.

वृद्धपणातही ते फळ देत राहतील; ते टवटवीत आणि हिरवे राहतील.

हे यासाठी की, परमेश्वर सरळ आहे हे त्यांनी जाहीर करावे; तो माझा खडक आहे, आणि त्याच्याठायी काहीच अन्याय नाही.

संत मत्तयानुसार पवित्र सुवार्ता (5:1-16)

¶ जेव्हा येशूने त्या लोकसमुदायांना पाहीले तेव्हा तो डोंगरावर चढला, मग तो तेथे खाली बसला असता त्याचे शिष्य त्याच्याजवळ आले.

त्याने आपले तोंड उघडले व त्यांना शिकवले. तो म्हणाला;

¶ ‹“जे आत्म्याने ‘दीन’ ते धन्य आहेत, › ‹कारण स्वर्गाचे राज्य त्यांचे आहे.›

‹‘जे शोक करतात’, ते धन्य आहेत, › ‹कारण ‘त्यांचे सांत्वन करण्यात येईल.’›

‹‘जे सौम्य’ ते धन्य आहेत, › ‹कारण ‘त्यांना पृथ्वीचे वतन मिळेल.’›

‹जे न्यायीपणाचे भुकेले व तान्हेले ते धन्य आहेत, › ‹कारण ते संतुष्ट होतील.›

‹जे दयाळू ते धन्य आहेत, › ‹कारण त्यांच्यावर दया करण्यात येईल.›

‹जे अंतःकरणाचे शुद्ध ते धन्य आहेत, › ‹कारण ते देवाला पाहतील.›

‹जे शांती करणारे ते धन्य आहेत, कारण त्यांना देवाची मुले म्हणतील.›

‹न्यायीपणाकरता ज्यांचा छळ झाला आहे ते धन्य आहेत, › ‹कारण स्वर्गाचे राज्य त्यांचे आहे.›

¶ ‹जेव्हा लोक माझ्यामुळे तुमचा अपमान करतात व छळ करतात आणि तुमच्याविरुध्द सर्वप्रकारचे वाईट लबाडीने बोलतात तेव्हा तुम्ही धन्य आहात.›

‹आनंद व उल्लास करा, कारण तुम्हास स्वर्गात मोठे प्रतिफळ आहे, कारण तुमच्यापूर्वी जे संदेष्टे होऊन गेले त्यांचाही लोकांनी अशाचप्रकारे छळ केला.›

¶ ‹तुम्ही पृथ्वीचे मीठ आहात, पण जर मिठाचा खारटपणा गेला तर ते पुन्हा कसे खारट बनवता येईल? ते तर पुढे कोणत्याही उपयोगाचे न राहता केवळ फेकून देण्याच्या व मनुष्यांच्या पायदळी तुडवले जाण्यापुरते उपयोगाचे राहील.›

‹तुम्ही जगाचा प्रकाश आहात; डोंगरावर वसलेले नगर लपवता येत नाही.›

‹आणि दिवा लावून तो कोणी टोपलीखाली लपवून ठेवत नाही, उलट तो दिवठणीवर ठेवतात म्हणजे तो दिवा घरातील सर्वांना प्रकाश देतो.›

‹तुमचा प्रकाश इतरांसमोर याप्रकारे प्रकाशू द्या की जेणेकरून त्यांनी तुमची चांगली कामे पाहावी आणि तुमचा पिता जो स्वर्गात आहे त्याचे गौरव करावे.›

Tenoo oasht emmok o piekhristos nem pekyot en aghathos nem pi epnevma ethowab je akee ak soati emmon nai nan

हे ख्रिस्ता, तुझ्या हितकर पित्याबरोबर व पवित्र आत्म्यासोबत आम्ही तुझी उपासना करतो; कारण तू आला आहेस व आम्हाला तारले आहेस.

1. हे तू, जो सहाव्या दिवशी व सहाव्या प्रहराला परदिसात आमचे पिता आदाम यांनी धाडसाने केलेल्या पापासाठी क्रूसावर खिळला गेलास, आमच्या पापांची लिहिलेली पावती फाडून टाक, हे ख्रिस्ता आमच्या देव, आणि आम्हांला तार. मी प्रभूला हाक मारली आणि त्याने मला ऐकले. देवा, माझी प्रार्थना ऐक; माझी विनंती नाकारणोकोस. सायंकाळी, सकाळी आणि मध्यान्ही माझ्याकडे लक्ष दे आणि मला ऐक. मी माझी वचने सांगतो, आणि तो माझा आवाज ऐकतो व माझ्या आत्म्यास शांतीने सोडवितो.

पित्याला, पुत्राला आणि पवित्र आत्म्यास महिमा असो.

2. हे येशू ख्रिस्त, आमचे देव, जो सहाव्या प्रहराला क्रूसावर खिळला गेला, आणि वृक्षामुळे पापाचा नाश केला; आणि तुझ्या मृत्यूने तू तुझ्या स्वतःच्या हस्तांनी घडविलेल्या पण पापात मेलेल्या मनुष्याला जिवंत केलेस; तुझ्या आरोग्यदायी व जीवनदायी दु:खांनी, आणि ज्यांनी तुला खिळले त्या खिळ्यांनी, आमच्या वेदनांना मृत कर. आमच्या मनांना भौतिक कृत्यांच्या उद्दाम निष्काळजीपणापासून व लौकिक वासनांपासून सोडव, आणि तुझ्या स्वर्गीय आज्ञांची स्मृती दे, तुझ्या करूणेप्रमाणे.

आता आणि सदैव व युगानुयुगे, आमेन.

3. आमच्या अनेक पापांमुळे आमच्याकडे न कृपाभाजनत्व आहे, न सबब, न निर्दोषत्व; म्हणून आम्ही, तुझ्यामार्फत, तुझ्यापासून जन्माला आलेल्या त्या प्रभूकडे विनवितो, हे देवजननी, कुमारी; कारण आपल्या तारणाऱ्याकडे तुझी मध्यस्थी विपुल व ग्राह्य आहे. हे पवित्र माता, ज्याला तू जन्म दिलास त्याच्यापाशी तुझ्या मध्यस्थीतून पाप्यांना दूर ठेवू नकोस; कारण तो दयाळू आहे व आम्हांस तारण्यास समर्थ आहे; कारण त्याने आम्हांस सोडविण्यासाठी दु:ख भोगले. तुझी करूणा लवकर आम्हांपर्यंत पोहोचू दे; कारण आम्ही फारच नम्र व खचलेलो आहोत. आम्हांला मदत कर, हे देवा, आमच्या तारणासाठी, तुझ्या नावाच्या महिमेसाठी. हे प्रभो, आम्हांला सोडव आणि तुझ्या पवित्र नावाकरिता आमची पापे क्षमा कर.

आता आणि सदैव व युगानुयुगे, आमेन.

4. तू सर्व पृथ्वीच्या मध्यभागी तारण सिद्ध केलेस, हे ख्रिस्ता आमच्या देव, जेव्हा तू तुझे पवित्र हात क्रूसावर पसरविले; म्हणून सर्व राष्ट्रे म्हणत ओरडतात, “तुला महिमा असो, हे प्रभो”.

पित्याला, पुत्राला आणि पवित्र आत्म्यास महिमा असो.

5. तुझ्या अविनाशी व्यक्तीस आम्ही वंदन करतो, हे कल्याणकर्ता, व आमच्या पापांची क्षमा मागतो, हे ख्रिस्ता आमच्या देव. कारण तुझ्या इच्छेने तू क्रूसावर उंचावला जाण्यास प्रसन्न झालास, ज्यायोगे तू निर्माण केलेल्यांना विरोधकाच्या गुलामीतून सोडविले. आम्ही तुझ्याकडे हाक मारून तुला धन्यवाद देतो; कारण तू जगाला मदत करण्यास आला असता, हे तारणारा, तू सर्वांना आनंदाने भरलास. प्रभो, तुला महिमा असो.

आता आणि सदैव व युगानुयुगे, आमेन.

6. तू कृपाभरित आहेस, हे देवजननी, कुमारी; आम्ही तुझे स्तवन करतो; कारण तुझ्या पुत्राच्या क्रॉसद्वारे हेडीस कोसळला व मृत्यू रद्द झाला. आम्ही मेलो होतो पण उठविले गेलो आणि अनंत जीवनास पात्र झालो, आणि पहिल्या परदिसाचा आनंद मिळविला. म्हणून आम्ही कृतज्ञतेने अमर ख्रिस्ता आमच्या देवाचे गौरव करतो.

तेव्हा उपासक प्रार्थना करतो:

प्रभो, आम्हाला ऐक आणि आमच्यावर दया कर, आणि आमची पापे क्षमा कर. आमेन.

(प्रभो, दया कर) 41 वेळा

क्षमा

हे आमचे राजा, सर्वशक्तिमान, आमच्या प्रभू व देव व तारणहार येशू ख्रिस्ताचे पिता — आम्ही तुझे आभार मानतो व तुला गौरव देतो; कारण तू तुझ्या एकुलत्या पुत्राच्या दुःखांच्या काळांना सांत्वन व प्रार्थनेचे काळ बनविले. आमची विनंती तू स्वीकार; आमच्यावरील आमच्या पापांची लिहिलेली पावती पुसून टाक; जशी तू या पवित्र प्रहराला तुझ्या एकुलत्या पुत्रा, आमच्या प्रभू व तारणहार येशू ख्रिस्ताच्या क्रूसावर ते फाडले; ज्याद्वारे तू शत्रूची सर्व शक्ती पाडलीस.

हे देवा, आम्हांला तेजस्वी काळ, निर्दोष चाल, शांत जीवन दे; की आम्ही तुझ्या पवित्र, वंदनीय नावास शोभेसे वागू; आणि तुझ्या एकुलत्या पुत्रा, आमच्या प्रभू येशू ख्रिस्ताच्या भयंकर व न्याय्य न्यायासनासमोर आम्ही शिक्षा न पावता उभे राहू; आणि सर्व संतांबरोबर तुला गौरव देऊ. तू अनादि पिता, आणि तुझ्याशी समसमान पुत्र, आणि जीवनदायी पवित्र आत्मा, आता आणि सदैव आणि सर्व युगांच्या युगांपर्यंत. आमेन.

प्रत्येक प्रहराच्या शेवटी केली जाणारी विनवणी

हे देवा, आमच्यावर दया कर; मग पुन्हा दया कर. जो सर्वकाळ आणि प्रत्येक क्षणी, स्वर्गात आणि पृथ्वीवर, वंदनीय आणि गौरवित — आमचा चांगला ख्रिस्त देव — दीर्घशांतीचा, विपुल दयेचा, व अतिशय करुणामय; जो धर्मीजनांवर प्रेम करतो आणि पाप्यांवर दया करतो, ज्याचा मी पहिला आहे; जो पाप्याचा मृत्यू इच्छित नाही, तर त्याची परतफेड व जीवन इच्छितो; जो सर्वांना उध्दाराकडे बोलावतो, येणाऱ्या चांगल्या वस्तूंच्या वचनासाठी.

हे प्रभु, या क्षणी व प्रत्येक क्षणी आमच्या विनंत्या स्वीकार. आमचे जीवन सुलभ कर; आम्हांला तुझ्या आज्ञांचे पालन करण्यास मार्गदर्शित कर. आमच्या आत्म्यांना पवित्र कर. आमच्या देहांना शुद्ध कर. आमचे विचार उभे कर. आमच्या इच्छांना शुद्ध कर. आमच्या आजारांना आरोग्य दे आणि आमची पापे क्षमा कर. सर्व वाईट दु:ख व हृदयदुखण्यापासून आम्हांला सोडव. तुझ्या पवित्र दूतांनी आम्हांला वेढून ठेव, की त्यांच्या छावणीत आम्ही राखलेले व मार्गदर्शित होऊ; आणि आम्ही विश्वासाच्या ऐक्याला आणि तुझ्या अगम्य व अमर्याद गौरवाच्या ज्ञानाला पोहोचू — कारण तू अनंतकाळपर्यंत धन्य आहेस. आमेन.

हे देवा, आम्हांला पात्र कर की आम्ही कृतज्ञतापूर्वक म्हणू: आमच्या स्वर्गस्थ पित्या...