Mga Oras ng Panalangin

Pambungad ng Bawat Oras

Sa ngalan ng Ama at ng Anak at ng Espiritu Santo

Isang Diyos. Amen.

Panginoon, maawa Ka. Panginoon, maawa Ka. Panginoon, pagpalain Mo. Amen.

Luwalhati sa Ama at sa Anak at sa Espiritu Santo ngayon at kailanman at hanggang sa mga kapanahunan ng mga kapanahunan. Amen.

AMA NAMIN

Magsidalangin nga kayo ng ganito: Ama namin na nasa langit ka, Sambahin nawa ang pangalan mo.

Dumating nawa ang kaharian mo. Gawin nawa ang iyong kalooban, kung paano sa langit, gayon din naman sa lupa.

Ibigay mo sa amin ngayon ang aming kakanin sa araw-araw.

At ipatawad mo sa amin ang aming mga utang, gaya naman namin na nagpatawad sa mga may utang sa amin.

At huwag mo kaming ihatid sa tukso, kundi iligtas mo kami sa masama. Sapagka't iyo ang kaharian, at ang kapangyarihan, at ang kaluwalhatian, magpakailan man. Siya nawa.

Panalangin ng Pasasalamat

Magpasalamat tayo sa Gumagawa ng kabutihan, mahabagin na Diyos, Ama ng ating Panginoon at Diyos at Tagapagligtas na si Jesucristo, sapagkat Kaniyang tinakpan tayo, tinulungan tayo, iningatan tayo, tinanggap tayo sa Kaniya, kinaawaan tayo, pinatibay tayo, at dinala tayo sa oras na ito. Hinihiling din natin sa Kaniya na ingatan Niya tayo sa araw na ito na banal at sa lahat ng araw ng ating buhay na may ganap na kapayapaan. Ang Panginoon na ating Diyos, ang Makapangyarihan sa lahat.

O Panginoong Diyos, Makapangyarihan sa lahat, Ama ng aming Panginoon at Diyos at Tagapagligtas na si Jesucristo, nagpapasalamat kami sa Iyo sa lahat ng bagay, dahil sa lahat ng bagay, at sa lahat ng kalagayan; sapagkat Ikaw ang nagtakip sa amin, tumulong sa amin, nag-ingat sa amin, tumanggap sa amin, naawa sa amin, umalalay sa amin, at nagdala sa amin sa oras na ito.

Dahil dito, humihiling at dumadalangin kami mula sa Iyong kabutihan, O Mapagmahal sa mga tao: ipagkaloob Mo na aming matapos ang araw na ito na banal at ang lahat ng araw ng aming buhay na may ganap na kapayapaan na may takot sa Iyo. Ang lahat ng panibugho, lahat ng tukso, lahat ng gawa ng diyablo, ang pakana ng masasamang tao, at ang pagbangon ng mga kaaway na nakatago at hayag, alisin Mo sa amin, at sa buong Iyong bayan, at sa Iyong banal na dako na ito. Ang mabuti at ang kapaki-pakinabang, ipagkaloob Mo sa amin. Sapagkat Ikaw ang nagbigay sa amin ng kapangyarihang yurakan ang mga ahas at mga alakdan at ang lahat ng kapangyarihan ng kaaway. Huwag Mo kaming ihatid sa tukso, kundi iligtas Mo kami mula sa masama.

Sa biyaya at mga kahabagan at pagmamahal sa mga tao ng Iyong Bugtong na Anak, ang aming Panginoon at Diyos at Tagapagligtas na si Jesucristo—sa pamamagitan Niya ang kaluwalhatian at karangalan at kapangyarihan at pagsamba ay nararapat sa Iyo, kasama Niya at kasama ng nagbibigay-buhay na Espiritu Santo, na kapantay Mo, ngayon at kailanman at hanggang sa mga kapanahunan ng mga kapanahunan. Amen.

AWIT 50

Ang makapangyarihang Dios, ang Dios na Panginoon, ay nagsalita, at tinawag ang lupa mula sa pagsikat ng araw hanggang sa paglubog niyaon.

Mula sa Sion na kasakdalan ng kagandahan, sumilang ang Dios.

Ang aming Dios ay darating at hindi tatahimik; isang apoy na mamumugnaw sa harap niya, at magiging totoong malaking bagyo sa palibot niya.

Siya'y tatawag sa langit sa itaas, at sa lupa upang mahatulan niya ang kaniyang bayan:

Pisanin mo ang aking mga banal sa akin; yaong nangakikipagtipan sa akin sa pamamagitan ng hain.

At ipahahayag ng langit ang kaniyang katuwiran; sapagka't ang Dios ay siyang hukom. (Selah)

Iyong dinggin, Oh aking bayan, at ako'y magsasalita; Oh Israel, at ako'y magpapatotoo sa iyo: Ako'y Dios, iyong Dios.

Hindi kita sasawayin dahil sa iyong mga hain; at ang iyong mga handog na susunugin ay laging nangasa harap ko.

Hindi ako kukuha ng baka sa iyong bahay, ni ng kambing na lalake sa iyong mga kawan.

Sapagka't bawa't hayop sa gubat ay akin, at ang hayop sa libong burol.

Nakikilala ko ang lahat ng mga ibon sa mga bundok: at ang mga mabangis na hayop sa parang ay akin.

Kung ako'y magutom ay hindi ko sasaysayin sa iyo: sapagka't ang sanglibutan ay akin, at ang buong narito.

Kakanin ko ba ang laman ng mga toro, o iinumin ang dugo ng mga kambing?

Ihandog mo sa Dios ang haing pasasalamat: at tuparin mo ang iyong mga panata sa Kataastaasan:

At tumawag ka sa akin sa kaarawan ng kabagabagan; ililigtas kita, at iyong luluwalhatiin ako.

Nguni't sa masama ay sinasabi ng Dios, Anong iyong gagawin upang ipahayag ang aking mga palatuntunan, at iyong kinuha ang aking tipan sa iyong bibig?

Palibhasa't iyong kinapopootan ang pagtuturo, at iyong iniwawaksi ang aking mga salita sa likuran mo.

Pagka nakakita ka ng magnanakaw, pumipisan ka sa kaniya, at naging kabahagi ka ng mga mapangalunya.

Iyong ibinubuka ang iyong bibig sa kasamaan, at ang iyong dila ay kumakatha ng karayaan.

Ikaw ay nauupo, at nagsasalita laban sa iyong kapatid; iyong dinudusta ang anak ng iyong sariling ina.

Ang mga bagay na ito ay iyong ginawa, at ako'y tumahimik; iyong inisip na tunay na ako'y gayong gaya mo: nguni't sasawayin kita, at aking isasaayos sa harap ng iyong mga mata.

Gunitain nga ninyo ito, ninyong nangakalilimot sa Dios, baka kayo'y aking pagluraylurayin at walang magligtas:

Ang naghahandog ng haing pasasalamat ay lumuluwalhati sa akin; at sa kaniya na nagaayos ng kaniyang pakikipagusap aking ipakikita ang pagliligtas ng Dios.

Simula ng Panalangin

Papuri ng Ikasiyam na Oras ng pinagpalang araw; inihahandog ko sa Kristo na aking Hari at aking Diyos, at idinadalangin kong patawarin Niya ang aking mga kasalanan.

AWIT 95

Oh magsiparito kayo, tayo'y magsiawit sa Panginoon: tayo'y magkaingay na may kagalakan sa malaking bato na ating kaligtasan.

Tayo'y magsiharap sa kaniyang harapan na may pagpapasalamat, tayo'y magkaingay na may kagalakan sa kaniya na may mga pagaawitan.

Sapagka't ang Panginoon ay dakilang Dios, at dakilang Hari sa lahat ng mga dios,

Na sa kaniyang kamay ang mga malalim na dako ng lupa, ang mga kataasan ng mga bundok ay kaniya rin.

Ang dagat ay kaniya, at kaniyang ginawa: at ang kaniyang mga kamay ay lumikha ng tuyong lupa.

Oh magsiparito kayo, tayo'y magsisamba at magsiyukod; tayo'y magsiluhod sa harap ng Panginoon na May-lalang sa atin.

Sapagka't siya'y ating Dios, at tayo'y bayan ng kaniyang pastulan, at mga tupa ng kaniyang kamay. Ngayon, kung inyong didinggin ang kaniyang tinig!

Huwag ninyong papagmatigasin ang inyong puso, gaya sa Meriba, gaya sa kaarawan ng Masa sa ilang:

Nang tuksuhin ako ng inyong mga magulang, tinikman ako, at nakita ang gawa ko.

Apat na pung taong namanglaw ako sa lahing yaon, at aking sinabi, Bayan na nagkakamali sa kanilang puso. At hindi naalaman ang aking mga daan:

Kaya't ako'y sumumpa sa aking poot, na sila'y hindi magsisipasok sa aking kapahingahan.

AWIT 96

Oh magsiawit kayo sa Panginoon ng bagong awit: magsiawit kayo sa Panginoon, buong lupa.

Magsiawit kayo sa Panginoon, purihin ninyo ang pangalan niya; ihayag ninyo ang kaniyang pagliligtas sa araw-araw.

Ipahayag ninyo ang kaniyang kaluwalhatian sa mga bansa ang kagilagilalas niyang mga gawa sa lahat ng mga bayan.

Sapagka't dakila ang Panginoon, at marapat na purihin: siya'y kinatatakutang higit kay sa lahat na dios.

Sapagka't lahat ng mga dios sa mga bayan ay mga diosdiosan. Nguni't nilikha ng Panginoon ang langit.

Karangalan at kamahalan ay nasa harap niya: kalakasan at kagandahan ay nasa kaniyang santuario.

Magbigay kayo sa Panginoon, kayong mga angkan ng mga bayan, magbigay kayo sa Panginoon ng kaluwalhatian at kalakasan.

Magbigay kayo sa Panginoon ng kaluwalhatiang ukol sa kaniyang pangalan; kayo'y mangagdala ng handog, at magsipasok kayo sa kaniyang mga looban.

Oh sambahin ninyo ang Panginoon sa kagandahan ng kabanalan: manginig kayo sa harap niya, buong lupa.

Sabihin ninyo sa gitna ng mga bansa, ang Panginoon ay naghahari: ang sanglibutan naman ay natatatag na hindi makikilos: kaniyang hahatulan ng karapatan ang mga bayan.

Matuwa ang langit at magalak ang lupa; humugong ang dagat, at ang buong naroon;

Sumaya ang bukiran at lahat na nasa kaniya; kung magkagayo'y aawit dahil sa kagalakan, ang lahat na punong kahoy sa gubat;

Sa harap ng Panginoon; sapagka't siya'y dumarating: sapagka't siya'y dumarating upang hatulan ang lupa: kaniyang hahatulan ng katuwiran ang sanglibutan, at ng kaniyang katotohanan ang mga bayan.

AWIT 97

Ang Panginoon ay naghahari; magalak ang lupa; matuwa ang karamihan ng mga pulo.

Mga ulap at kadiliman ay nasa palibot niya: katuwiran at kahatulan ay patibayin ng kaniyang luklukan.

Apoy ay nagpapauna sa kaniya, at sinusunog ang kaniyang kaaway sa buong palibot.

Tumatanglaw ang mga kidlat niya sa sanglibutan: nakita ng lupa, at niyanig.

Ang mga bundok ay natunaw na parang pagkit sa harap ng Panginoon, sa harapan ng Panginoon ng buong lupa.

Ipinahahayag ng langit ang kaniyang katuwiran, at nakita ng lahat na bayan ang kaniyang kaluwalhatian.

Mangahiya silang lahat na nangaglilingkod sa mga larawan, nangaghahambog tungkol sa mga diosdiosan: kayo'y magsisamba sa kaniya kayong lahat na mga dios.

Narinig ng Sion, at natuwa, at ang mga anak na babae ng Juda ay nangagalak; dahil sa iyong mga kahatulan, Oh Panginoon.

Sapagka't ikaw, Oh Panginoon, ay kataastaasan sa buong lupa: ikaw ay nataas na totoong higit kay sa lahat na mga dios.

Oh kayong nagsisiibig sa Panginoon, ipagtanim ninyo ang kasamaan. Kaniyang iniingatan ang mga kaluluwa ng kaniyang mga banal; kaniyang iniligtas sila sa kamay ng masama.

Liwanag ang itinanim na ukol sa mga banal, at kasayahan ay sa may matuwid na puso.

Mangatuwa kayo sa Panginoon, kayong mga matuwid; at mangagpasalamat sa kaniyang banal na pangalan.

AWIT 98

Oh magsiawit kayo sa Panginoon ng bagong awit; sapagka't siya'y gumawa ng mga kagilagilalas na bagay: ang kaniyang kanan at ang kaniyang banal na bisig ay gumawa ng kaligtasan para sa kaniya:

Ipinakilala ng Panginoon ang kaniyang pagliligtas: ang kaniyang katuwiran ay ipinakilala niyang lubos sa paningin ng mga bansa.

Kaniyang inalaala ang kaniyang kagandahang-loob at ang kaniyang pagtatapat sa bahay ng Israel: nakita ng lahat ng mga wakas ng lupa ang pagliligtas ng aming Dios.

Magkaingay kayo na may kagalakan sa Panginoon, buong lupa. Mangagpasimula at magsiawit dahil sa kagalakan, oo, magsiawit kayo ng mga pagpuri.

Magsiawit kayo sa Panginoon ng mga pagpuri ng alpa; ng alpa at ng tinig na tugma.

Ng mga pakakak at tunog ng corneta magkaingay kayo na may kagalakan sa harap ng Hari, ng Panginoon.

Humugong ang dagat at ang buong naroon; ang sanglibutan at ang nagsisitahan doon;

Ipakpak ng mga baha ang kanilang mga kamay; magawitan ang mga burol dahil sa kagalakan;

Sa harap ng Panginoon, sapagka't siya'y dumarating upang hatulan ang lupa: kaniyang hahatulan ng katuwiran ang sanglibutan, at ng karapatan ang mga bayan.

AWIT 99

Ang Panginoon ay naghahari: manginig ang mga bayan. Siya'y nauupo sa mga querubin; makilos ang lupa.

Ang Panginoon ay dakila sa Sion; at siya'y mataas na higit sa lahat ng mga bayan.

Purihin nila ang iyong dakila at kakilakilabot na pangalan: siya'y banal.

Ang lakas naman ng hari ay umiibig ng kahatulan; ikaw ay nagtatatag ng karampatan, ikaw ay nagsasagawa ng kahatulan at katuwiran sa Jacob.

Ibunyi ninyo ang Panginoon nating Dios, at magsisamba kayo sa harap ng kaniyang tungtungan; siya'y banal.

Si Moises at si Aaron sa gitna ng kaniyang mga saserdote, at si Samuel sa kanila na nagsisitawag sa kaniyang pangalan; sila'y nagsisitawag sa Panginoon, at siya'y sumasagot sa kanila.

Siya'y nagsasalita sa kanila sa haliging ulap: kanilang iniingatan ang kaniyang mga patotoo, at ang palatuntunan na ibinigay niya sa kanila.

Sumagot ka sa kanila, Oh Panginoon naming Dios; ikaw ay Dios na nagpatawad sa kanila, bagaman nanghiganti ka sa kanilang mga gawa.

Ibunyi ninyo ang Panginoon nating Dios, at magsisamba kayo sa kaniyang banal na bundok; sapagka't ang Panginoon nating Dios ay banal.

AWIT 100

Magkaingay kayo na may kagalakan sa Panginoon, kayong lahat na lupain.

Mangaglingkod kayo na may kasayahan sa Panginoon; magsilapit kayo sa kaniyang harapan na may awitan.

Alamin ninyo na ang Panginoon ay siyang Dios; siya ang lumalang sa atin, at tayo'y kaniya: tayo'y kaniyang bayan, at mga tupa ng kaniyang pastulan.

Magsipasok kayo sa kaniyang mga pintuang-daan na may pagpapasalamat, at sa kaniyang looban na may pagpupuri: mangagpasalamat kayo sa kaniya, at purihin ninyo ang kaniyang pangalan.

Sapagka't ang Panginoon ay mabuti; ang kaniyang kagandahang-loob ay magpakailan man; at ang kaniyang pagtatapat ay sa lahat ng sali't saling lahi.

AWIT 109

Huwag kang mapayapa, Oh Dios na aking kapurihan;

Sapagka't ang bibig ng masama at ang bibig ng magdaraya ay ibinuka nila laban sa akin: sila'y nangagsalita sa akin na may sinungaling na dila.

Kanilang kinulong ako sa palibot ng mga salitang pagtatanim, at nagsilaban sa akin ng walang kadahilanan.

Sa kabayaran ng aking pagibig ay mga kaaway ko sila: nguni't ako'y tumatalaga sa dalangin.

At iginanti nila sa akin ay kasamaan sa mabuti, at pagtatanim sa pagibig ko.

Lagyan mo ng masamang tao siya: at tumayo nawa ang isang kaaway sa kaniyang kanan.

Pagka siya'y nahatulan, lumabas nawa siyang salarin; at maging kasalanan nawa ang kaniyang dalangin.

Maging kaunti nawa ang kaniyang mga kaarawan; at kunin nawa ng iba ang kaniyang katungkulan.

Maulila nawa ang kaniyang mga anak, at mabao ang kaniyang asawa.

Magsilaboy nawa ang kaniyang mga anak, at mangagpalimos; at hanapin nila ang kanilang pagkain sa kanilang mga dakong guho.

Kunin nawa ng manglulupig ang lahat niyang tinatangkilik; at samsamin ng mga taga ibang lupa ang kaniyang mga gawa.

Mawalan nawa ng maawa sa kaniya; at mawalan din ng maawa sa kaniyang mga anak na ulila.

Mahiwalay nawa ang kaniyang kaapuapuhan; sa lahing darating ay mapawi ang kaniyang pangalan.

Maalaala nawa ng Panginoon ang kasamaan ng kaniyang mga magulang; at huwag mapawi ang kasalanan ng kaniyang ina,

Mangalagay nawa silang lagi sa harap ng Panginoon, upang ihiwalay niya ang alaala sa kanila sa lupa.

Sapagka't hindi niya naalaalang magpakita ng kaawaan, kundi hinabol ang dukha at mapagkailangan, at ang may bagbag na puso, upang patayin.

Oo, kaniyang inibig ang sumpa, at dumating sa kaniya; at hindi siya nalulugod sa pagpapala, at malayo sa kaniya.

Nagsusuot naman siya ng sumpa na parang kaniyang damit, at nasok sa kaniyang mga loob na bahagi na parang tubig, at parang langis sa kaniyang mga buto.

Sa kaniya'y maging gaya nawa ng balabal na ibinabalabal, at gaya ng bigkis na ibinibigkis na lagi.

Ito ang kagantihan sa aking mga kaaway na mula sa Panginoon, at sa kanilang nangagsasalita ng kasamaan laban sa aking kaluluwa.

Nguni't gumawa kang kasama ko, Oh Dios na Panginoon, alang-alang sa iyong pangalan: sapagka't ang iyong kagandahang-loob ay mabuti, iligtas mo ako,

Sapagka't ako'y dukha at mapagkailangan, at ang aking puso ay nasaktan sa loob ko.

Ako'y yumayaong gaya ng lilim pagka kumikiling: ako'y itinataas at ibinababa ng hangin na parang balang.

Ang aking mga tuhod ay mahina sa pagaayuno, at ang aking laman ay nagkukulang ng katabaan.

Ako nama'y naging kadustaan sa kanila: pagka kanilang nakikita ako, kanilang pinagagalawgalaw ang kanilang ulo.

Tulungan mo ako, Oh Panginoon kong Dios; Oh iligtas mo ako ayon sa iyong kagandahang-loob:

Upang kanilang maalaman na ito'y iyong kamay; na ikaw, Panginoon, ang may gawa.

Sumumpa sila, nguni't magpapala ka: pagka sila'y nagsibangon, sila'y mangapapahiya, nguni't ang iyong lingkod ay magagalak.

Manamit ng kasiraang puri ang mga kaaway ko, at matakpan sila ng kanilang sariling kahihiyan na parang balabal.

Ako'y magpapasalamat ng marami ng aking bibig sa Panginoon; Oo, aking pupurihin siya sa gitna ng karamihan.

Sapagka't siya'y tatayo sa kanan ng mapagkailangan, upang iligtas sa kanilang nagsisihatol ng kaniyang kaluluwa.

AWIT 110

Sinabi ng Panginoon sa aking panginoon, umupo ka sa aking kanan, hanggang sa aking gawing tungtungan mo ang iyong mga kaaway.

Pararatingin ng Panginoon ang setro ng iyong kalakasan mula sa Sion: magpuno ka sa gitna ng iyong mga kaaway.

Ang bayan mo'y naghahandog na kusa sa kaarawan ng iyong kapangyarihan, sa kagandahan ng kabanalan: mula sa bukang liwayway ng umaga, ikaw ay may hamog ng iyong kabinataan.

Sumumpa ang Panginoon, at hindi magsisisi, Ikaw ay saserdote magpakailan man ayon sa pagkasaserdote ni Melchisedech.

Ang Panginoon sa iyong kanan ay hahampas sa mga hari sa kaarawan ng kaniyang poot.

Siya'y hahatol sa gitna ng mga bansa, kaniyang pupunuin ng mga bangkay ang mga pook; siya'y manghahampas ng ulo sa maraming lupain.

Siya'y iinom sa batis sa daan: kaya't siya'y magtataas ng ulo.

AWIT 111

Purihin ninyo ang Panginoon. Ako'y magpapasalamat sa Panginoon ng aking buong puso, sa kapulungan ng matuwid, at sa kapisanan.

Ang mga gawa ng Panginoon ay dakila, siyasat ng lahat na nagtatamo ng kaligayahan diyan.

Ang kaniyang gawa ay karangalan at kamahalan: at ang kaniyang katuwiran ay nananatili magpakailan man.

Kaniyang ginawa ang kaniyang mga kababalaghang gawa upang alalahanin: ang Panginoon ay mapagbiyaya at puspos ng kahabagan.

Siya'y nagbigay ng pagkain sa nangatatakot sa kaniya: kaniyang aalalahaning lagi ang kaniyang tipan.

Kaniyang ipinakilala sa kaniyang bayan ang kapangyarihan ng kaniyang mga gawa, sa pagbibigay niya sa kanila ng mana ng mga bansa.

Ang mga gawa ng kaniyang mga kamay ay katotohanan at kahatulan: lahat niyang mga tuntunin ay tunay.

Nangatatatag magpakailan-kailan man, mga yari sa katotohanan at katuwiran.

Siya'y nagsugo ng katubusan sa kaniyang bayan; kaniyang iniutos ang kaniyang tipan magpakailan man: banal at kagalanggalang ang kaniyang pangalan.

Ang pagkatakot sa Panginoon ay pasimula ng karunungan; may mabuting pagkaunawa ang lahat na nagsisisunod ng kaniyang mga utos. Ang kaniyang kapurihan ay nananatili magpakailan man.

AWIT 112

Purihin ninyo ang Panginoon. Mapalad ang tao na natatakot sa Panginoon, na naliligayang mainam sa kaniyang mga utos.

Ang kaniyang binhi ay magiging makapangyarihan sa lupa; ang lahi ng matuwid ay magiging mapalad.

Kaginhawahan at kayamanan ay nasa kaniyang bahay: at ang kaniyang katuwiran ay nananatili magpakailan man.

Sa matuwid ay bumabangon ang liwanag sa kadiliman: siya'y mapagbiyaya at puspos ng kahabagan, at matuwid.

Ang ikabubuti ng taong mapagbiyaya at nagpapahiram, kaniyang aalalayan ang kaniyang usap sa kahatulan.

Sapagka't siya'y hindi makikilos magpakailan man; ang matuwid ay maaalaalang walang hanggan.

Siya'y hindi matatakot sa mga masamang balita: ang kaniyang puso ay matatag, na tumitiwala sa Panginoon.

Ang kaniyang puso ay natatag, siya'y hindi matatakot, hanggang sa kaniyang makita ang nasa niya sa kaniyang mga kaaway.

Kaniyang pinanabog, kaniyang ibinigay sa mapagkailangan; ang kaniyang katuwiran ay nananatili magpakailan man, ang kaniyang sungay ay matataas na may karangalan.

Makikita ng masama, at mamamanglaw; siya'y magngangalit ng kaniyang mga ngipin, at matutunaw: ang nasa ng masama ay mapaparam.

AWIT 114

Nang lumabas ang Israel sa Egipto, ang sangbahayan ni Jacob mula sa bayang may ibang wika;

Ang Juda ay naging kaniyang santuario, ang Israel ay kaniyang sakop.

Nakita ng dagat, at tumakas; ang Jordan ay napaurong.

Ang mga bundok ay nagsiluksong parang mga lalaking tupa, ang mga munting gulod na parang mga batang tupa.

Anong ipakikialam ko sa iyo, Oh dagat, na ikaw ay tumatakas? sa iyo Jordan, na ikaw ay umuurong?

Sa inyo mga bundok, na kayo'y nagsisiluksong parang mga lalaking tupa; sa inyong mga munting gulod, na parang mga batang tupa?

Mayanig ka, ikaw na lupa, sa harapan ng Panginoon, sa harapan ng Dios ni Jacob;

Na pinapagiging tipunan ng tubig ang malaking bato. Na bukal ng tubig ang pingkiang bato.

AWIT 115

Huwag sa amin, Oh Panginoon, huwag sa amin, kundi sa iyong pangalan ay magbigay kang karangalan, dahil sa iyong kagandahang-loob, at dahil sa iyong katotohanan.

Bakit sasabihin ng mga bansa, Saan nandoon ngayon ang kanilang Dios?

Nguni't ang aming Dios ay nasa mga langit: kaniyang ginagawa ang kaniyang ibigin.

Ang kanilang mga diosdiosan ay pilak at ginto, yari ng mga kamay ng mga tao.

Sila'y may mga bibig, nguni't sila'y hindi nangagsasalita; mga mata'y mayroon sila, nguni't hindi sila nangakakakita;

Sila'y may mga tainga, nguni't hindi sila nangakakarinig; mga ilong ay mayroon sila, nguni't hindi sila nangakakaamoy;

Mayroon silang mga kamay, nguni't hindi sila nangakatatangan; mga paa ay mayroon sila, nguni't hindi sila nangakalalakad; ni nangagsasalita man sila sa kanilang ngalangala.

Ang nagsisigawa sa kanila ay magiging gaya nila; Oo, bawa't tumitiwala sa kanila.

Oh Israel, tumiwala ka sa Panginoon: siya'y kanilang saklolo at kanilang kalasag.

Oh sangbahayan ni Aaron, magsitiwala kayo sa Panginoon: siya'y kanilang saklolo at kanilang kalasag.

Kayong nangatatakot sa Panginoon, magsitiwala kayo sa Panginoon; siya'y kanilang saklolo at kanilang kalasag.

Inalaala tayo ng Panginoon; kaniyang pagpapalain tayo: kaniyang pagpapalain ang sangbahayan ni Israel, kaniyang pagpapalain ang sangbahayan ni Aaron.

Kaniyang pagpapalain ang nangatatakot sa Panginoon, ang mababa at gayon ang mataas.

Palalaguin kayo ng Panginoon ng higit at higit, kayo at ang inyong mga anak.

Pinagpala kayo ng Panginoon, na gumawa ng langit at lupa.

Ang mga langit ay mga langit ng Panginoon; nguni't ang lupa ay kaniyang ibinigay sa mga anak ng mga tao.

Ang patay ay hindi pumupuri sa Panginoon, ni sinomang nabababa sa katahimikan;

Nguni't aming pupurihin ang Panginoon mula sa panahong ito hanggang sa walang hanggan. Purihin ninyo ang Panginoon.

ANG BANAL NA EBANGHELYO AYON KAY SAN LUCAS (9:10-17)

At nang magsibalik ang mga apostol, ay isinaysay nila sa kaniya kung anong mga bagay ang kanilang ginawa. At sila'y isinama niya, at lumigpit na bukod sa isang bayan na tinatawag na Betsaida.

Datapuwa't nang maalaman ng mga karamihan ay nagsisunod sa kaniya: at sila'y tinanggap niyang may galak at sinasalita sa kanila ang tungkol sa kaharian ng Dios, at pinagagaling niya ang nangagkakailangang gamutin.

At nagpasimulang kumiling ang araw; at nagsilapit ang labingdalawa, at nangagsabi sa kaniya, Paalisin mo ang karamihan, upang sila'y magsiparoon sa mga nayon at sa mga lupaing nasa palibotlibot, at mangakapanuluyan, at mangakakuha ng pagkain: sapagka't tayo'y nangarito sa isang ilang na dako.

Datapuwa't sinabi niya sa kanila, Bigyan ninyo sila ng makakain. At sinabi nila, Wala tayo kundi limang tinapay at dalawang isda; malibang kami'y magsiyaon at ibili ng pagkain ang lahat ng mga taong ito.

Sapagka't sila'y may limang libong lalake. At sinabi niya sa kaniyang mga alagad, Paupuin ninyo sila ng pulupulutong, na may tiglilimangpu bawa't isa.

At gayon ang ginawa nila, at pinaupo silang lahat.

At kinuha niya ang limang tinapay at ang dalawang isda, at pagtingala sa langit, ay kaniyang pinagpala, at pinagputolputol; at ibinigay sa mga alagad upang ihain sa harap ng karamihan.

At sila'y nagsikain, at nangabusog ang lahat: at ang lumabis sa kanila na mga pinagputolputol ay pinulot na labingdalawang bakol.

Tenoo oasht emmok o piekhristos nem pekyot en aghathos nem pi epnevma ethowab je akee ak soati emmon nai nan

Sinasamba Ka namin, O Cristo, kasama ang Iyong Mabuting Ama at ang Espiritu Santo, sapagkat dumating Ka at iniligtas Mo kami.

1. Ikaw na tumikim ng kamatayan sa laman sa ikasiyam na oras alang-alang sa amin na mga makasalanan, puksain Mo ang aming mga pita ng laman, O Cristo na aming Diyos, at iligtas Mo kami. Nawa’y lumapit sa Iyo ang aking pagsusumamo, O Panginoon; ayon sa Iyong salita ay bigyan Mo ako ng pang-unawa. Nawa’y dumating sa Iyong harapan ang aking daing; ayon sa Iyong salita ay buhayin Mo ako.

Doxa Patri ke Eioa ke Agio Pnevmati

Luwalhati sa Ama, at sa Anak, at sa Espiritu Santo.

2. Ikaw na ipinagkatiwala ang espiritu sa mga kamay ng Ama habang nakabitin Ka sa krus, sa ikasiyam na oras, at pumatnubay sa magnanakaw na ipinako kasama Mo upang pumasok sa Paraiso: huwag Mo akong pabayaan, O Mabuti, ni itakwil ako na nawawala; kundi pakabanalin Mo ang aking kaluluwa at liwanagan ang aking pag-unawa, at pahintulutan Mo akong makabahagi sa biyaya ng Iyong nagbibigay-buhay na mga misteryo; upang kapag natikman ko ang Iyong mga kabutihan, maghandog ako sa Iyo ng papuri na hindi malamig, na kinasasabikan ang Iyong kaningningan higit sa lahat, O Cristo na aming Panginoon, at iligtas Mo kami.

Ke nin ke a ee ke ees toos e onas toan e oa noan ameen.

Ngayon at kailanman at magpasawalang-hanggan. Amen.

3. Ikaw na ipinanganak ng Birhen alang-alang sa amin, at nagtiis ng pagpapako sa krus, O Mabuti, at pinawi ang kamatayan sa pamamagitan ng Iyong kamatayan, at hayag na ipinakita ang pagkabuhay sa pamamagitan ng Iyong pagkabuhay na mag-uli, O Diyos, huwag Mong ilayo ang Iyong sarili sa mga nilikha ng Iyong sariling mga kamay, kundi ipamalas, O Mabuti, ang Iyong pag-ibig sa tao. Tanggapin mula sa Iyong Ina ang pamamagitan para sa amin. Iligtas, O Tagapagligtas, ang dukhang bayan. Huwag Mo kaming iwan hanggang wakas, at huwag Mo kaming talikdan magpakailanman. Huwag Mong sirain ang Iyong tipan, at huwag Mong alisin sa amin ang Iyong awa, alang-alang kay Abraham na Iyong minamahal, kay Isaac na Iyong lingkod, at kay Israel na Iyong banal.

Ke nin ke a ee ke ees toos e onas toan e oa noan ameen.

Ngayon at kailanman at magpasawalang-hanggan. Amen.

4. Nang makita ng Magnanakaw ang Prinsipe ng Buhay na nakabitin sa krus, kanyang sinabi: “Kung ang Ipinapako kasáma natin ay hindi Diyos na nagkatawang-tao, hindi sana nagtago ang araw ng liwanag nito, ni nanginig ang lupa. Ngunit O, Ikaw na Makapangyarihan sa lahat na nagtitiyaga sa lahat, alalahanin Mo ako, O Panginoon, kapag dumating Ka sa Iyong kaharian.”

Doxa Patri ke Eioa ke Agio Pnevmati

Luwalhati sa Ama, at sa Anak, at sa Espiritu Santo.

5. Ikaw na tumanggap ng pagpapahayag ng Magnanakaw sa krus, tanggapin Mo rin kami sa Iyo, O Mabuti; kami na marapat sa hatol ng kamatayan dahil sa aming mga kasalanan. Ipinahahayag naming lahat ang aming mga kasalanan kasama niya, at kinikilala ang Iyong pagka-Diyos, at sumisigaw kasáma niya na sinasabi, “Alalahanin Mo kami, O Panginoon, kapag dumating Ka sa Iyong Kaharian.”

Ke nin ke a ee ke ees toos e onas toan e oa noan ameen.

Ngayon at kailanman at magpasawalang-hanggan. Amen.

6. Nang makita ng Ina ang Kordero at Pastol, ang Tagapagligtas ng sanlibutan, na nakabitin sa Krus, Siya’y nagsabi habang lumuluha: “Nagalak ang sanlibutan sa pagtanggap ng kaligtasan, ngunit nagliliyab ang aking puso habang tinitingnan ko ang Iyong pagpapapako na Iyong tinitiis alang-alang sa lahat, Anak ko at aking Diyos.”

Pagkatapos ay mananalangin ang sumasamba:

Panginoon, dinggin Mo kami at maawa Ka sa amin at patawarin Mo ang aming mga kasalanan. Amen.

(Panginoon, maawa Ka) 41 ulit

Absolusyon

O Diyos na Ama ng aming Panginoon at Diyos at Tagapagligtas na si Jesucristo, na sa Kaniyang pagpapakita ay iniligtas Mo kami at pinalaya mula sa pagkaalipin ng kaaway: idinadalangin namin sa Kaniyang dakilang pinagpalang Pangalan—ilayo Mo ang aming mga isipan mula sa makamundong pagkabalisa at mga pita ng laman, tungo sa pag-alaala ng Iyong mga hatol na makalangit; at ganapin Mo sa amin ang Iyong pag-ibig sa sangkatauhan, O Mabuti. At nawa'y ang aming mga panalangin sa lahat ng oras, at ang panalangin ng ika-siyam na oras na ito, ay maging kalugud-lugod sa Iyo. At pagkalooban Mo kami na lumakad na nararapat sa tawag na sa amin ay itinawag; upang kapag kami'y umalis sa katawang ito, kami'y mabilang kasama ng mga sumasamba na marapat sa mga paghihirap ng Iyong Bugtong na Anak na si Jesucristo na aming Panginoon; at kamtin ang awa, kapatawaran ng aming mga kasalanan, at kaligtasan, kasama ng hanay ng mga banal na tunay Kang kinalugdan mula pa noong una hanggang sa walang hanggan.

O Diyos, pawiin Mo sa amin ang lahat ng kapangyarihan ng kaaway at ang lahat ng kanyang masasamang hukbo, gaya ng pagyurak sa kanila ng Iyong Bugtong na Anak sa kapangyarihan ng Kaniyang nagbibigay-buhay na krus. At tanggapin Mo kami sa Iyo, O aming Panginoong Jesucristo, gaya ng pagtanggap Mo sa magnanakaw sa kanan nang Ikaw ay nakabitin sa kahoy ng krus. At paliwanagan Mo kami gaya ng pagliwanag Mo sa mga nasa kadiliman ng Hades. At ibalik Mo kaming lahat sa Paraiso ng kaluguran, sapagkat Ikaw, O aming Panginoon, ay Diyos na pinagpala; at sa Iyo, kasama ng Iyong mabuting Ama at ng Banal na Espiritu, nararapat ang kaluwalhatian at karangalan at kapangyarihan at paghahari at pagsamba, magpakailanman. Amen.

Panawagan na Ipinapanalangin sa Wakas ng Bawat Oras

Maawa Ka sa amin, O Diyos, pagkatapos ay maawa Ka sa amin. Ikaw na sa bawat panahon at bawat oras, sa langit at sa lupa, ay sinasamba at dinadakila: si Kristo na aming mabuting Diyos, banayad sa galit, sagana sa awa, at napakayaman sa kahabagan; na umiibig sa matuwid at naaawa sa mga makasalanan, na ako ang una sa mga ito; na hindi Mo ibig ang kamatayan ng makasalanan, kundi na siya'y magsisi at mabuhay; na tumatawag sa lahat tungo sa kaligtasan alang-alang sa pangako ng mga mabubuting bagay na inaasahan.

Panginoon, tanggapin Mo mula sa amin sa oras na ito at sa bawat oras ang aming mga kahilingan. Padaliin Mo ang aming buhay, at patnubayan Mo kami upang gawin ang Iyong mga utos. Pabanalin Mo ang aming mga kaluluwa. Linisin Mo ang aming mga katawan. Itindig Mo ang aming mga pag-iisip. Dalisayín Mo ang aming mga layon. Pagalingin Mo ang aming mga sakit at patawarin Mo ang aming mga kasalanan. At iligtas Mo kami mula sa bawa't masamang kalungkutan at kirot ng puso. Paligiran Mo kami ng Iyong mga banal na anghel, upang sa kanilang kampo kami ay maging iniingatan at tinuturuang tama, upang makarating kami sa pagkakaisa ng pananampalataya at sa pagkakilala ng Iyong kaluwalhatiang di-nahahawakan at walang hanggan; sapagkat Ikaw ay pinagpala magpakailanman. Amen.

O Diyos, gawin Mo kaming karapat-dapat na sabihin nang may pasasalamat: Ama Namin, sumasalangit Ka