Karakia i ngā haora

Kupu Whakataki mō ia Hāora

I runga i te Ingoa o te Matua, o te Tama, o te Wairua Tapu

te Atua Kotahi. Āmene.

E te Ariki, kia aroha mai. E te Ariki, kia aroha mai. E te Ariki, manaakitia. Āmene.

Korōria ki te Matua, ki te Tama, ki te Wairua Tapu, ināianei, ā i ngā wā katoa, ā, a ngā tau o ngā tau, Āmene.

TE INOI A TE ARIKI

¶ Na kia penei ta koutou inoi: E to matou Matua i te rangi, Kia tapu tou ingoa.

Kia tae mai tou rangatiratanga. Kia meatia tau e pai ai ki runga ki te whenua, kia rite ano ki to te rangi.

Homai ki a matou aianei he taro ma matou mo tenei ra.

Murua o matou hara, me matou hoki e muru nei i o te hunga e hara ana ki a matou.

Aua hoki matou e kawea kia whakawaia; engari whakaorangia matou i te kino. Nou hoki te rangatiratanga, te kaha, me te kororia, ake, ake. Amine.

Te Inoi o te Whakawhetai

Me whakawhetai tātou ki te Kaihanga o ngā mea pai katoa, te Atua atawhai, te Matua o tō mātou Ariki, tō mātou Atua, tō mātou Kaiwhakaora, a Īhu Karaiti; nō te mea i taupokina mātou, i āwhinatia, i tiakina, i whakaae mai Ia kia whakatata atu mātou ki a Ia, i aroha mai, i whakakaha, ā, i kawe mai mātou e Ia ki tēnei hāora. Waihō anō, kia inoi tātou kia tiakina mātou i tēnei rā tapu me ngā rā katoa o tō mātou oranga i runga i te rangimārie katoa. E te Kaha Rawa, e tō mātou Ariki, e tō mātou Atua.

E te Ariki, e te Atua Kaha Rawa, te Matua o tō mātou Ariki, tō mātou Atua, tō mātou Kaiwhakaora, a Īhu Karaiti, ka whakawhetai mātou ki a Koe i ngā wā katoa, mō ngā mea katoa, ā, i roto i ngā āhuatanga katoa; nō te mea i taupokina mātou, i āwhinatia, i tiakina, i whakaae mai Koe kia whakatata atu mātou ki a Koe, i aroha mai Koe, i whakakaha, ā, i kawea mai mātou e Koe ki tēnei hāora.

Nā konei ka inoi, ka tono atu mātou i tō pai, e te Kaiaroha ki te tangata: homai kia oti pai i a mātou tēnei rā tapu me ngā rā katoa o tō mātou oranga i runga i te rangimārie katoa me te wehi ki a Koe. Ko ngā hae katoa, ko ngā whakamātautau katoa, ko ngā mahi katoa a te rewera, me ngā whakaaro kino a te hunga nanakia, me ngā whakaekenga a ō mātou hoariri huna, kitea, tangohia atu i a mātou, i tō iwi katoa, i tēnei wāhi tapu hoki. Ko ngā mea pai me ngā mea whaihua, hoatu ki a mātou. Nō te mea nāu i homai te mana kia takahia e mātou ngā nakahi me ngā pungawerewere me te kaha katoa o te hoariri. Kaua mātou e kawea kia whakawaia; engari whakaorangia mātou i te kino.

Mā te aroha noa, me ngā atawhaitanga, me te aroha ki te tangata o tōu Tama Kotahi, tō mātou Ariki, tō mātou Atua, tō mātou Kaiwhakaora, a Īhu Karaiti; nāna hoki te korōria, te hōnore, te kaha, me te koropiko e tika ana mōu, me Ia, me te Wairua Tapu, te Kai-homai i te ora, he ōrite ki a Koe, ināianei, ā i ngā wā katoa, ā, a ngā tau o ngā tau, Āmene.

Waiata 50

¶ He himene na Ahapa. Kua puaki te kupu a te Atua, a te Atua tonu, a Ihowa, a karangatia ana e ia te whenua i te putanga mai o te ra, tae noa ki tona torengitanga.

Kua tiaho mai te Atua i roto i Hiona, i te tino o te ataahua.

Ka haere mai to tatou Atua, e kore ano e wahangu: ka kai te kapura i tona aroaro, a ka hukerikeri te awha ki tetahi taha ona, ki tetahi taha.

Ka karangatia e ia nga rangi i runga, me te whenua hoki, ki te whakaritenga mo tona iwi.

Huihuia mai ki ahau taku hunga tapu, te hunga i whakarite kawenata ki ahau i runga i te patunga tapu.

A ma nga rangi e whakakite tona tika: ko te Atua ake nei hoki te kaiwhakawa. (Hera.

¶ Whakarongo, e toku iwi, a ka korero ahau; e Iharaira, ka whakaatu ahau ki a koe; ko ahau te Atua, ko tou Atua.

E kore ahau e riri ki a koe mo au patunga tapu; a kei toku aroaro tonu au tahunga tinana.

E kore ahau e tango i tetahi puru i roto i tou whare, i etahi koati toa ranei i roto i au taiepa.

Naku nei hoki nga kirehe katoa o te ngahere, nga kararehe i runga i te mano o nga pukepuke.

E matau ana ahau ki nga manu katoa o nga maunga; naku ano nga kirehe o te parae.

Me he matekai toku, e kore ahau e korero ki a koe: naku nei hoki te ao, me ona tini mea.

E kai koia ahau i te kikokiko o nga puru, e inu ranei i te toto o nga koati?

Ko te whakawhetai hei patunga tapu mau ki te Atua; whakamana hoki au kupu taurangi ki te Runga Rawa.

A karanga ki ahau i te ra o te he: maku koe e whakaora, a ka whakakororiatia ahau e koe.

¶ Ki te tangata hara ia ka mea te Atua, He aha mau te whakapuaki i aku tikanga, te whakahua ranei i taku kawenata e tou mangai?

Kua kino nei hoki koe ki te ako, a e akiri ana i aku kupu ki muri i a koe.

I tou kitenga i te tahae, na whakaae ana koe ki a ia; a whai tahi ana me te hunga puremu.

Kua tukua e koe tou mangai ki te kino; a e tito hianga ana tou arero.

Noho ana koe, ka korero kino ki tou teina: ngautuara tonu iho koe ki te tama a tou whaea.

Ko au mahi enei, a wahangu tonu ahau; i mea koe he pena pu ahau me koe: otira ka riria koe e ahau, ka whakararangitia ano aua mea ki tou aroaro.

Na whakaaroa tenei, e te hunga kua wareware ki te Atua; kei haehaea koutou e ahau, a kahore he kaiwhakaora.

Ko te whakamoemiti te patunga tapu e whai kororia ai ahau: ko te tangata hoki he tika nei tona ara ka whakakitea e ahau ki a ia te whakaoranga a te Atua.

Te Timatanga o te Inoi

Te Waiata o te Hāora Tuaiva o te rā manaakitia, ka tukuna e au ki a te Karaiti tōku Kīngi, tōku Atua, ā ka inoi au kia murua āku hara.

Waiata 95

¶ Tena, kia waiata tatou ki a Ihowa: kia hari te hamama ki te kamaka o to tatou whakaoranga.

Kia haere tatou me te whakawhetai atu ki tona aroaro: kia ngahau hoki a tatou himene ki a ia.

No te mea he Atua nui hoki a Ihowa, he Kingi nui i nga atua katoa.

Kei tona ringa nga wahi hohonu o te whenua: a nana nga maunga teitei.

Nana te moana, nana ano i hanga, a na ona ringa i whai ahua ai te whenua maroke.

Haere mai tatou, kia koropiko, kia tuohu: kia tukua nga turi ki te aroaro o Ihowa, o to tatou Kaihanga.

¶ Ko ia hoki to tatou Atua; ko tatou tana iwi e hepara ai, nga hipi a tona ringa. Ki te rongo koutou ki tona reo aianei.

Kaua e whakapakeketia o koutou ngakau: kei pera me o te whakatoinga, me o te ra o te whakamatautauranga i te koraha;

I ahau i whakamatautauria e o koutou matua, i ata mohiotia, i to ratou kitenga ano hoki i aku mahi.

E wha tekau nga tau i hoha ai ahau ki tenei whakatupuranga, na ka mea ahau; He iwi ngakau kotiti ke ratou, kahore hoki ratou e mohio ki aku ara.

Na reira i riri ai ahau, i oati ai hoki; e kore ratou e tae ki toku okiokinga.

Waiata 96

¶ Waiatatia he waiata hou ki a Ihowa: waiata, e te whenua katoa, ki a Ihowa.

Waiata ki a Ihowa, whakapaingia tona ingoa: whakakitea tana whakaoranga i tenei ra, i tenei ra.

Whakapuakina tona kororia i waenganui i nga tauiwi, ana mahi whakamiharo i waenganui i nga iwi katoa.

He nui hoki a Ihowa, he tika ano kia nui te whakamoemiti ki a ia: kia wehingia nuitia ai i nga atua katoa.

He whakapakoko hoki nga atua katoa o nga iwi: na Ihowa ia i hanga nga rangi.

He honore, he kororia kei tona aroaro: kei tona wahi tapu te kaha me te ataahua.

Waiho atu i a Ihowa, e nga hapu katoa o nga iwi: waiho atu i a Ihowa te kororia me te kaha.

Waiho atu i a Ihowa te kororia e tika ana mo tona ingoa: maua mai he whakahere, haere mai hoki ki ona marae.

Koropiko ki a Ihowa i roto i te ataahua o te tapu: kia wehi ra ki tona aroaro, e te whenua katoa.

¶ Mea atu i waenganui o nga tauiwi, E kingi ana a Ihowa: ka u te whenua, te taea te whakangaueue; ka tika ana whakawa mo nga iwi.

Kia hari nga rangi, kia koa te whenua, kia haruru te moana, me nga mea e hua ana i roto.

Kia hari te mara, me nga mea katoa i runga: ko reira ano koa ai nga rakau katoa o te ngahere;

Ki te aroaro o Ihowa, e haere mai ana hoki ia; e haere mai ana ia ki te whakawa mo te whenua: ka whakawa ia mo te ao i runga i te tika, mo nga iwi hoki i runga i tona pono.

Waiata 97

¶ Ko Ihowa te Kingi, kia hari te whenua, kia koa nga tini moutere.

Ko te kapua me te pouri kei ona taha katoa: ko te tika, ko te whakawa, te turanga o tona torona.

He kapura e haere ana i mua i a ia, a pau ake ona hoariri a taka noa.

Marama tonu te ao i ana uira: i kite te whenua, a wiri ana.

Rewa noa nga maunga, ano he ware pi, i te aroaro o Ihowa, i te aroaro o te Ariki o te whenua katoa.

E whakapuakina ana e nga rangi tona tika: a e kitea ana e nga iwi katoa tona kororia.

Kia whakama katoa te hunga e mahi ana ki nga whakapakoko, e whakamanamana ana ki nga atua horihori: koropiko ki a ia, e nga atua katoa.

¶ I rongo a Hiona, a koa ana: whakamanamana ana nga tamahine o Hura, e Ihowa, ki au whakaritenga.

Ko koe hoki, e Ihowa, kei runga noa ake i te whenua katoa: kua whakanuia koe ki runga noa ake i nga atua katoa.

E te hunga e aroha ana ki a Ihowa, e kino ki te he: e tiakina ana e ia nga wairua o tana hunga tapu; e whakaorangia ana ratou e ia i nga ringa o te hunga kino.

Kua oti te marama te whakato mo te hunga tika: me te koa mo te hunga ngakau tapatahi.

Kia hari ki a Ihowa, e te hunga tika: whakamoemiti ki tona ingoa tapu.

Waiata 98

¶ He himene. Waiatatia ki a Ihowa he waiata hou; he mahi whakamiharo hoki ana: na tona ringa matau, na tona ringa tapu, i taea ai e ia te whakaora.

Kua whakakitea e Ihowa tana whakaoranga, kua whakapuakina e ia tona tika ki te aroaro o nga tauiwi.

Kua mahara ia ki tana mahi tohu, ki tona pono ki te whare o Iharaira; a kua kite nga pito katoa o te whenua i te whakaoranga a to tatou Atua.

¶ Kia hari te hamama, e te whenua katoa, ki a Ihowa: hamama, kia hari, ae ra, himene atu.

Himene ki a Ihowa i runga i te hapa; i runga i te hapa, me te himene ano te reo.

I runga i te tetere, i te tangi ano o te koronete: kia hari te hamama ki te aroaro o Ihowa, o te Kingi.

Kia haruru te moana me nga mea e hua ana i roto, te ao me ona tangata e noho ana i runga.

Kia papaki nga ringa o nga roma, kia hari tahi nga pukepuke.

Ki te aroaro o Ihowa: e haere mai ana hoki ia ki te whakawa mo te whenua: ka whakawa ia mo te ao i runga i te tika, mo nga iwi hoki i runga i te pono.

Waiata 99

¶ Ko Ihowa te Kingi; kia wiri nga iwi: e noho ana ia i waenganui i nga kerupima; kia ngaueue te whenua.

He nui a Ihowa i Hiona: kei runga ake ia i nga iwi katoa.

Kia whakamoemiti ratou ki tou ingoa nui, whakamataku; he tapu ia.

E matenui ana hoki te kaha o te kingi ki te whakawa tika; ko koe hei whakapumau i te pono: he whakawa tika, he hekore tau mahi i roto i a Hakopa.

Whakanuia a Ihowa, to tatou Atua: koropiko ki tona turanga waewae; he tapu ia.

¶ Ko Mohi raua ko Arona i roto i ana tohunga, me Hamuera i roto i te hunga e karanga ana ki tona ingoa: i karanga ratou ki a Ihowa, a whakahoki kupu ana mai ia ki a ratou.

I korero ia ki a ratou i roto i te pou kapua: i pupuri ratou i ana whakaaturanga, i te tikanga i whakatakotoria e ia ki a ratou.

E Ihowa, e to matou Atua, i whakahoki kupu koe ki a ratou: he Atua tohu koe i a ratou, otiia i rapu utu ano koe mo a ratou mahi.

Whakanuia a Ihowa, to tatou Atua, koropiko atu i tona maunga tapu: he tapu hoki a Ihowa, to tatou Atua.

Waiata 100

¶ He himene whakamoemiti. Kia hari te hamama ki a Ihowa, e nga whenua katoa:

Mahi atu ki a Ihowa i runga i te koa, waiata haere ki tona aroaro.

Kia matau ki a Ihowa, ko ia te Atua: nana tatou i hanga, ehara hoki i a tatou: ko tana iwi tatou, ko ana hipi e hepara ai.

Tomokia ona tatau i runga i te whakawhetai, ona marae i runga i te whakamoemiti: whakawhetai atu ki a ia, whakapaingia tona ingoa.

He pai hoki a Ihowa, pumau tonu tana mahi tohu: a kei tena whakatupuranga, kei tena whakatupuranga, tona pono.

Waiata 109

¶ Ki te tino kaiwhakatangi. He himene na Rawiri. E te Atua, e whakamoemiti nei ahau, kei wahangu koe:

Kua puaki hoki te mangai o te tangata kino me te mangai o te tangata tinihanga, ki te he moku: he teka o ratou arero, e korero nei moku.

I karapotia hoki ahau e ratou ki nga kupu mauahara, a i whawhai takekore ki ahau.

Mo toku aroha he riri ta ratou whakautu: ko ahau ia, he inoi taku.

E homai ana e ratou ki ahau he kino mo te pai, he mauahara mo toku aroha.

¶ Meinga he tangata kino hei rangatira mona; kia tu he hoariri ki tona ringa matau.

Kia tau te he ki a ia, ina whakawakia: kia waiho ano tana inoi hei hara.

Kia torutoru ona ra; kia riro tana mahi tirotiro i tetahi atu.

Kia pania ana tamariki, kia pouarutia hoki tana wahine.

Kia kopikopiko noa ana tamariki, pinono ai: kia rapu kai hoki ma ratou i o ratou wahi mokemoke.

Kia haoa e te kaituku moni ana mea katoa; kia pahuatia hoki e nga tangata iwi ke ana mauiuitanga.

Kaua tetahi hei hoatu noa i te aroha ki a ia: kaua hoki tetahi hei atawhai i ana pani.

Kia hatepea putia ona uri: a i to muri whakatupuranga kia horoia rawatia atu o ratou ingoa.

Kia maharatia e Ihowa te kino o ona matua: kei murua hoki te hara o tona whaea.

Kia mau tonu ki te aroaro o Ihowa: kia hatepea atu ai e ia te maharatanga ki a ratou i runga i te whenua.

Mona kihai i mahara ki te mahi tohu: heoi tukino ana ia i te ware, i te rawakore, i te hunga ngakau maru, kia patua ai ratou.

Ae ra, i pai ia ki te kanga, a kua tae mai ki a ia: kihai ia i aro ki te manaaki, heoi kua mamao tera i a ia.

I kakahu ia i te kanga ki a ia, ano ko tona kakahu: na kua tae tera ki roto ki a ia ano he wai, me he hinu hoki ki roto ki ona wheua.

Waiho ki a ia hei kakahu hipoki mona, hei whitiki hoki e whitikiria tonutia ai ia.

Na hei utu tena ma Ihowa ki oku hoariri, ki te hunga hoki e korero kino nei ki toku wairua.

¶ Kia puta tau mahi moku, e te Atua, e te Ariki, he whakaaro ki tou ingoa: na te mea he pai tau mahi tohu, whakaorangia ahau,

He ware hoki ahau, he rawakore, kua mamae hoki toku ngakau i roto i ahau.

Ka riro ahau me te atarangi e whakawairua kau ana: e peipeia ana ahau me he mawhitiwhiti.

Hurorirori kau oku turi i te nohopuku; a e kohia ana te ngako o oku kikokiko.

Kua waiho ahau hei tawainga ma ratou: ka kite ratou i ahau, ka ruru o ratou matenga.

Awhinatia ahau, e Ihowa, e toku Atua: kia rite ki tou aroha tau whakaora i ahau.

Kia matau ai ratou ko tou ringa itene: a nau tenei, e Ihowa, i mea.

Ma ratou e kanga, mau ia e manaaki: kia whakama ratou ina whakatika; ko tau pononga ia kia hari.

Kia whakakakahuria oku hoariri ki te whakama, a ko to ratou numinumi hei koroka hipoki mo ratou.

Ka tino whakawhetai toku mangai ki a Ihowa, ae ra, ka whakamoemiti ahau ki a ia i waenganui o te mano.

E tu hoki ia ki te ringa matau o te rawakore, hei whakaora i a ia i te hunga e whakahe ana i tona wairua.

Waiata 110

¶ He himene na Rawiri. I mea a Ihowa ki toku Ariki: Hei toku matau koe noho ai, kia meinga ra ano e ahau ou hoariri hei turanga waewae mou.

Ma Ihowa e tono mai te tokotoko o tou kaha i Hiona: hei rangatira koe i waenganui i ou hoariri.

Ka kakama tou iwi ki te tapae atu i a ratou i te ra o tou kaha: i te ataahua o nga mea tapu, no te kopu mai o te ata, kei a koe te tomairangi o tou whanaketanga.

Kua oati a Ihowa, e kore ano tana e puta ke; Hei tohunga koe ake ake, no te tikanga o Merekihereke.

¶ Kei tou matau te Ariki, ka maru i a ia nga kingi i te ra e riri ai ia.

E whakawa ia i waenganui i nga tauiwi; e whakakiia e ia nga whenua ki te tupapaku: ka maru i a ia nga upoko i nga whenua maha.

Ka inu wai ia i te awa i te ara: a ka ara tona matenga.

Waiata 111

¶ Whakamoemititia a Ihowa. Ka whakapaua toku ngakau ki te whakawhetai ki a Ihowa, i te runanga o te hunga tika, i te whakaminenga.

He nui nga mahi a Ihowa; e whakatakina ana e te hunga katoa e manako ana ki aua mea.

He mea honore, he mea kororia tana mahi: tu tonu tona tika ake ake.

Kua meinga e ia kia maharatia ana mahi whakamiharo: he atawhai a Ihowa, he aroha.

E homai ana e ia he kai ma te hunga e wehi ana ki a ia: ka mahara tonu ia ki tana kawenata.

¶ Kua whakakitea e ia ki tana iwi te kaha o ana mahi, i tana hoatutanga i to nga tauiwi hei kainga tupu mo ratou.

Ko nga mahi a ona ringa he pono, he whakawa tika: pono tonu ana akoranga katoa,

U tonu ake ake, e mahia ana i runga i te pono, i te tika.

I tonoa mai e ia he whakaoranga mo tana iwi: kua kiia iho e ia tana kawenata mo ake tonu atu; he tapu tona ingoa, e wehingia ana.

Ko te timatanga o te whakaaro nui he wehi ki a Ihowa: he ngarahu nui to te hunga katoa nana era mahi; mau te whakamoemiti ki a ia, ake ake.

Waiata 112

¶ Whakamoemititia a Ihowa. Ka hari te tangata e wehi ana i a Ihowa, e aro nui ana ki ana whakahau.

Ka nui ona uri ki runga ki te whenua; ka manaakitia te whakatupuranga o te hunga tika.

Kei tona whare te rawa, te taonga: ka pumau tonu tona tika, ake ake.

Ka maea ake te marama i roto i te pouri ki te hunga tika: he atawhai ia, he aroha, he tika.

He pono ka whiwhi painga te tangata he atawhai, he ohaoha tana mahi: ka u ana kupu i te whakawakanga.

¶ E kore hoki ia e whakangaueuetia ake ake: ka maharatia tonutia te tangata tika ake ake.

E kore ia e mataku i te rongo kino: e u ana tona ngakau, e whakawhirinaki ana ki a Ihowa.

Ka u tona ngakau, e kore ia e wehi, kia kite ra ano ia i tana i hiahia ai ki ona hoariri.

Kua tuwhaina e ia, kua hoatu ki te hunga rawakore: pumau tonu tona tika ake ake; ka ara tona haona i runga i te kororia.

Ka kite te tangata kino, a ka pouri; ka pakiri ona niho, memeha iho: pirau iho te hiahia o te hunga kino.

Waiata 114

¶ I te putanga mai o Iharaira i Ihipa, o te whare o Hakopa i te iwi reo ke,

Ko Hura tona wahi tapu, ko Iharaira tona rangatiratanga.

I kite te moana, a whati ana: i whakahokia ki muri a Horano.

Pekepeke ana nga maunga ano he hipi toa, nga pukepuke ano he reme.

I ahatia koe, e te moana, i whati ai koe e Horano, i whakahokia ai koe ki muri?

E nga maunga, i pekepeke ai koutou ano he hipi toa; e nga pukepuke, ano he reme?

E wiri, e te whenua, i te aroaro o te Ariki; i te aroaro o te Atua o Hakopa;

I meinga ai te toka hei hopua wai; te kiripaka hei puna wai.

Waiata 115

¶ Aua ki a matou, e Ihowa, aua ki a matou, engari me hoatu te kororia ki tou ingoa: whakaaroa tou aroha, tou pono.

Kia mea koia nga tauiwi: Kei hea ianei to ratou Atua?

Kei te rangi ia to matou Atua; kua meatia e ia nga mea katoa i pai ai ia.

He hiriwa a ratou whakapakoko, he koura, he mahi na te ringa tangata.

He mangai o ratou, a kahore e korero: he kanohi o ratou, a kahore e kite:

He taringa o ratou, a kahore e rongo: he ihu o ratou, a kahore e hongi:

He ringa o ratou, a kahore e whawha: he waewae o ratou, a kahore e haere: kahore hoki o ratou korokoro e korero.

Ka rite ki a ratou o ratou kaihanga; ae ra, te hunga katoa ano e whakawhirinaki ana ki a ratou.

¶ E Iharaira, whakawhirinaki ki a Ihowa: ko ia to ratou awhina, to ratou whakangungu rakau.

E te whare o Arona, whakawhirinaki ki a Ihowa: ko ia to ratou awhina, to ratou whakangungu rakau.

E te hunga e wehi ana i a Ihowa, whakawhirinaki ki a Ihowa: ko ia to ratou awhina, to ratou whakangungu rakau.

Kua mahara a Ihowa ki a tatou, mana tatou e manaaki: mana e manaaki te whare o Iharaira, mana e manaaki te whare o Arona.

Ka manaakitia e ia te hunga e wehi ana ki a Ihowa, te iti, te rahi.

Ka tapiritia ano e Ihowa ki a koutou, ki a koutou tahi ko a koutou tamariki.

He manaakitanga koutou na Ihowa, na te kaihanga o te rangi, o te whenua.

Ko nga rangi, he rangi no Ihowa; ko te whenua ia, he mea homai nana ki nga tama a te tangata.

E kore nga tupapaku e whakamoemiti ki a Ihowa: me te hunga katoa ano e heke ana ki te wahangutanga.

Ko matou ia ka whakapai ki a Ihowa aianei a ake ake. Whakamoemititia a Ihowa.

TE RONGOPAI TAPU A RUKA (9:10–17)

¶ A, no te hokinga mai o nga apotoro, ka korerotia ki a ia nga mea katoa i mea ai ratou. A ka tango ia i a ratou, ka haere ko ratou anake ki tetahi pa, ko Petahaira te ingoa.

Otira, i te kitenga o nga mano, ka aru i a ia: a ka manaaki ia i a ratou, ka korerotia ki a ratou te rangatiratanga o te Atua, whakaorangia ana hoki e ia te hunga e mea ana kia rongoatia.

Na kua titaha haere te ra; a ka haere mai te tekau ma rua, ka mea ki a ia, Tonoa te mano, kia haere ai ki nga kainga, ki nga whenua i tetahi taha, i tetahi taha, moe ai, ki te mea kei hoki ma ratou; he wahi koraha hoki tenei i a tatou nei.

A ka mea ia ki a ratou, Ma koutou e hoatu he kai ma ratou. ka mea ratou, heoi ano a matou e rima nga taro, e rua nga ika; ki te kahore ano ia matou e haere ki te hoko kai ma tenei iwi katoa.

Me te mea ano e rima mano nga tane. Ka mea ia ki ana akonga, Meinga ratou kia noho, kia rima tekau ki te nohoanga.

A pera ana ratou, meinga katoatia ana kia noho.

Na ka mau ia ki nga taro e rima, ki nga ika e rua, ka titiro ake ki te rangi, ka whakapai i aua mea, ka whawhati, ka hoatu ki nga akonga kia whakatakotoria atu ma te mano.

Na ka kai ratou, ka makona katoa: a kotahi tekau ma rua nga kete i kohia ake e ratou, he toenga na ratou no nga whatiwhatinga.

Tenoo oasht emmok o piekhristos nem pekyot en aghathos nem pi epnevma ethowab je akee ak soati emmon nai nan

Ka koropiko mātou ki a Koe, e te Karaiti, me tō Matua Pai, me te Wairua Tapu; nāu hoki i haere mai, i whakaora i a mātou.

1. E Koe i whakamātau i te mate ki te kikokiko i te haora tuaiwa mō mātou te hunga hara, whakamatea ō mātou hiahia kikokiko, e te Karaiti, tō mātou Atua, ā, whakaorangia mātou. Kia tata mai taku inoi ki a Koe, e te Ariki; homai he māramatanga ki ahau kia rite ki tāu kupu. Kia tae atu taku tono ki tō aroaro; whakaorangia ahau kia rite ki tāu kupu.

Doxa Patri ke Eioa ke Agio Pnevmati

Korōria ki te Matua, ki te Tama, ki te Wairua Tapu.

2. E Koe i tukua atu ai e Koe te wairua ki ngā ringa o te Matua, i a Koe e iri ana ki te ripeka i te haora tuaiwa, ā, i ārahi ai i te Tahae i ripekatia tahi me Koe kia tomo ki te Pararaiha; kaua ahau e warewaretia, e te Pai, kaua hoki ahau e whakakāhoretia, ahau te tangata ngaro; engari whakatapu i tōku wairua, whakamārama i tōku māramatanga, ā, tukua ahau kia whai wāhi ki te aroha noa o ōu mea ngaro whakaora; kia, ina reka ahau ki ōu atawhai, ka tukuna atu e ahau he whakamoemiti ki a Koe, kāore he mātaotao, e wawata ana ki tōu korōria i runga ake i ngā mea katoa, e te Karaiti, tō mātou Ariki, ā, whakaorangia mātou.

Ke nin ke a ee ke ees toos e onas toan e oa noan ameen.

Ināianei, ā, ake ake tonu atu, Āmine.

3. E Koe i whānau mai i te Puwaru mō mātou, ā, i whakamanawanui i te ripekatanga, e te Pai, ā, nā tōu matenga i whakakore te mate, ā, nā tōu aranga i whakaatu te aranga; e te Atua, kaua e tahuri atu i te hunga i hanga e ōu ringaringa; engari whakaatu mai, e te Pai, tōu aroha ki te tangata. Whakaae i te inoi tāpae a tō whaea mō mātou. Whakaorangia, e te Kaiwhakaora, te iwi whakaiti. Kaua mātou e waiho mō te mutunga; kaua hoki mātou e whakarērea ake ake. Kaua e whati tāu kawenata; kaua hoki e tangohia atu i a mātou tōu atawhai; mō Aperahama, tau e arohaina, mō Īhaka, tau pononga, me Īharaira, tau tangata tapu.

Ke nin ke a ee ke ees toos e onas toan e oa noan ameen.

Ināianei, ā, ake ake tonu atu, Āmine.

4. I te kitenga o te Tahae i te Rangatira o te Ora e iri ana ki te ripeka, ka mea ia, “Mehemea kāore te Tāngata e ripekatia ana me tātou nei i te Atua i noho kikokiko, kāore te rā i huna i ōna hihi, kāore hoki te whenua i wiri i te rū. Otiia, e te Kaha Rawa e manawanui ana ki ngā mea katoa, maumahara mai ki ahau, e te Ariki, ina tae mai Koe ki tōu rangatiratanga.”

Doxa Patri ke Eioa ke Agio Pnevmati

Korōria ki te Matua, ki te Tama, ki te Wairua Tapu.

5. E Koe i whakaae ki te whākī a te Tahae i runga i te ripeka, whakaae mai hoki ki a mātou, e te Pai; ko mātou e tika ana kia whiua ki te mate mō ō mātou hara. Ka whākī tātou katoa i ō mātou hara me ia, ā, ka mōhio ki tōu Atua‑tanga, ā, ka karanga tahi me ia, “Maumahara mai ki a mātou, e te Ariki, ina tae mai Koe ki tōu rangatiratanga.”

Ke nin ke a ee ke ees toos e onas toan e oa noan ameen.

Ināianei, ā, ake ake tonu atu, Āmine.

6. I te kitenga o te whaea i te Reme me te Hepara, te Kaiwhakaora o te ao, e iri ana ki te Ripeka, ka tangi ia, ka mea, “E hari ana te ao i te whiwhinga ki te whakaoranga, ko taku ngākau ia e wera ana i te tirohanga ki tōu ripekatanga e taumaha nei mō te katoa, e taku Tama, e taku Atua.”

Ka inoi te kai-inoi:

E te Ariki, whakarongo mai ki a mātou, kia aroha mai ki a mātou, ā, murua ō mātou hara. Āmine.

(E te Ariki, kia aroha mai) 41 ngā wā

Te Murunga Hara

E te Atua Matua, te Matua o tō mātou Ariki, tō mātou Atua, tō mātou Kaiwhakaora, a Īhu Karaiti, nāna nei i whakaora, i whakaora hoki i a mātou i te here o te hoariri i tōna putanga mai; ka inoi mātou ki tōu Ingoa tapu, nui: whakarerea tō mātou hinengaro i ngā whakaaro o te ao me ngā hiahia kikokiko, kia mahara ai ki ōu whakaritenga rangi; ā whakakīa mātou ki tōu aroha ki te tangata, e te Pai. Ā kia whakaaetia ō mātou īnoi i ngā wā katoa, ā ko te īnoi o tēnei hāora tuaiva, kia manakohia i mua i a Koe. Ā tukua kia haere mātou kia rite ki te karangatanga i karangatia ai mātou. Ā, ina puta mātou i tēnei kikokiko, kia whakaurua mātou ki roto ki te hunga e tika ana ki ngā mamae o tōu Tama kotahi, a Īhu Karaiti tō mātou Ariki, ā kia whiwhi mātou ki te aroha noa me te murunga hara me te whakaoranga tahi me te rārangi o ngā hunga tapu i whakamanawarekaia e Koe i te tino pono mai anō i te tīmatanga tae noa ki te mutunga.

E te Atua, whakakore i a mātou te kaha katoa o te hoariri me ana mano kino katoa, pēnei i tāu Tama kotahi i takahi ai i a rātou i te kaha o tōna Rīpeka e homai ana i te ora. Ā whiwhia mātou ki a Koe, e tō mātou Ariki a Īhu Karaiti, pēnei i tāu i whiwhi ai i te taha matau, i a Koe e iri ana ki te pou rīpeka. Ā whakamārama ki a mātou pēnei i tāu i whakamārama ai ki te hunga i te pōuri o te reinga. Awhinatia mātou katoa kia hoki ki te Pararaiha o te hari; nō te mea, e tō mātou Ariki, he Atua whakapaingia Koe; ā, e tika ana mōu, me tōu Matua pai, me te Wairua Tapu, te korōria, te hōnore, te kaha, te rangatiratanga, me te koropiko, ā ake ake, Āmene.

He Inoi tono ka inoi i te mutunga o ia Hāora

Tohungia mātou, e te Atua, kātahi anō ka tohungia. E Koe e whakamoemititia ana, e whakakorōria ana i ngā wā katoa, i ia hāora, i te rangi, i te whenua, e te Karaiti tō mātou Atua pai, e manawanui ana, e nui ana te atawhai, e kī ana i te ngākau aroha; e aroha ana ki te hunga tika, e atawhai ana ki te hunga hara, ko au te tuatahi; e kore nei e hiahia kia mate te tangata hara, engari kia tahuri, kia ora; e karanga ana i te katoa ki te whakaoranga mō te oati o ngā mea pai e tatari ana.

E te Ariki, whakaaetia ō mātou inoi i tēnei hāora, i ia hāora. Whakawātea tō mātou oranga; arahina mātou kia mahia ōu whakahau. Whakatapua ō mātou wairua. Whakamāhorahoratanga ō mātou tinana. Whakatika ō mātou whakaaro. Whakapai ō mātou whakaaro huna. Whakaorangia ō mātou māuiui, ā, murua ō mātou hara. Whakaorangia mātou i ia pouri kino, i ia māharahara o te ngākau. Karapīpihia mātou e āu anahera tapu; kia tiakina, kia arahina mātou e tō rātou puni; kia tae atu mātou ki te kotahitanga o te whakapono, ki te mōhiotanga o tō korōria kāore e kitea, kāore e whāiti; he mea whakapaingia Koe ā ake ake. Āmene.

E te Atua, meinga mātou kia tika kia mea atu mātou me te whakawhetai: E tō mātou Matua i te rangi