Haora Tuaono - Sext

Kupu Whakataki mō ia Hāora

I runga i te Ingoa o te Matua, o te Tama, o te Wairua Tapu

te Atua Kotahi. Āmene.

E te Ariki, kia aroha mai. E te Ariki, kia aroha mai. E te Ariki, manaakitia. Āmene.

Korōria ki te Matua, ki te Tama, ki te Wairua Tapu, ināianei, ā i ngā wā katoa, ā, a ngā tau o ngā tau, Āmene.

TE INOI A TE ARIKI

¶ Na kia penei ta koutou inoi: E to matou Matua i te rangi, Kia tapu tou ingoa.

Kia tae mai tou rangatiratanga. Kia meatia tau e pai ai ki runga ki te whenua, kia rite ano ki to te rangi.

Homai ki a matou aianei he taro ma matou mo tenei ra.

Murua o matou hara, me matou hoki e muru nei i o te hunga e hara ana ki a matou.

Aua hoki matou e kawea kia whakawaia; engari whakaorangia matou i te kino. Nou hoki te rangatiratanga, te kaha, me te kororia, ake, ake. Amine.

Te Inoi o te Whakawhetai

Me whakawhetai tātou ki te Kaihanga o ngā mea pai katoa, te Atua atawhai, te Matua o tō mātou Ariki, tō mātou Atua, tō mātou Kaiwhakaora, a Īhu Karaiti; nō te mea i taupokina mātou, i āwhinatia, i tiakina, i whakaae mai Ia kia whakatata atu mātou ki a Ia, i aroha mai, i whakakaha, ā, i kawe mai mātou e Ia ki tēnei hāora. Waihō anō, kia inoi tātou kia tiakina mātou i tēnei rā tapu me ngā rā katoa o tō mātou oranga i runga i te rangimārie katoa. E te Kaha Rawa, e tō mātou Ariki, e tō mātou Atua.

E te Ariki, e te Atua Kaha Rawa, te Matua o tō mātou Ariki, tō mātou Atua, tō mātou Kaiwhakaora, a Īhu Karaiti, ka whakawhetai mātou ki a Koe i ngā wā katoa, mō ngā mea katoa, ā, i roto i ngā āhuatanga katoa; nō te mea i taupokina mātou, i āwhinatia, i tiakina, i whakaae mai Koe kia whakatata atu mātou ki a Koe, i aroha mai Koe, i whakakaha, ā, i kawea mai mātou e Koe ki tēnei hāora.

Nā konei ka inoi, ka tono atu mātou i tō pai, e te Kaiaroha ki te tangata: homai kia oti pai i a mātou tēnei rā tapu me ngā rā katoa o tō mātou oranga i runga i te rangimārie katoa me te wehi ki a Koe. Ko ngā hae katoa, ko ngā whakamātautau katoa, ko ngā mahi katoa a te rewera, me ngā whakaaro kino a te hunga nanakia, me ngā whakaekenga a ō mātou hoariri huna, kitea, tangohia atu i a mātou, i tō iwi katoa, i tēnei wāhi tapu hoki. Ko ngā mea pai me ngā mea whaihua, hoatu ki a mātou. Nō te mea nāu i homai te mana kia takahia e mātou ngā nakahi me ngā pungawerewere me te kaha katoa o te hoariri. Kaua mātou e kawea kia whakawaia; engari whakaorangia mātou i te kino.

Mā te aroha noa, me ngā atawhaitanga, me te aroha ki te tangata o tōu Tama Kotahi, tō mātou Ariki, tō mātou Atua, tō mātou Kaiwhakaora, a Īhu Karaiti; nāna hoki te korōria, te hōnore, te kaha, me te koropiko e tika ana mōu, me Ia, me te Wairua Tapu, te Kai-homai i te ora, he ōrite ki a Koe, ināianei, ā i ngā wā katoa, ā, a ngā tau o ngā tau, Āmene.

Waiata 50

¶ He himene na Ahapa. Kua puaki te kupu a te Atua, a te Atua tonu, a Ihowa, a karangatia ana e ia te whenua i te putanga mai o te ra, tae noa ki tona torengitanga.

Kua tiaho mai te Atua i roto i Hiona, i te tino o te ataahua.

Ka haere mai to tatou Atua, e kore ano e wahangu: ka kai te kapura i tona aroaro, a ka hukerikeri te awha ki tetahi taha ona, ki tetahi taha.

Ka karangatia e ia nga rangi i runga, me te whenua hoki, ki te whakaritenga mo tona iwi.

Huihuia mai ki ahau taku hunga tapu, te hunga i whakarite kawenata ki ahau i runga i te patunga tapu.

A ma nga rangi e whakakite tona tika: ko te Atua ake nei hoki te kaiwhakawa. (Hera.

¶ Whakarongo, e toku iwi, a ka korero ahau; e Iharaira, ka whakaatu ahau ki a koe; ko ahau te Atua, ko tou Atua.

E kore ahau e riri ki a koe mo au patunga tapu; a kei toku aroaro tonu au tahunga tinana.

E kore ahau e tango i tetahi puru i roto i tou whare, i etahi koati toa ranei i roto i au taiepa.

Naku nei hoki nga kirehe katoa o te ngahere, nga kararehe i runga i te mano o nga pukepuke.

E matau ana ahau ki nga manu katoa o nga maunga; naku ano nga kirehe o te parae.

Me he matekai toku, e kore ahau e korero ki a koe: naku nei hoki te ao, me ona tini mea.

E kai koia ahau i te kikokiko o nga puru, e inu ranei i te toto o nga koati?

Ko te whakawhetai hei patunga tapu mau ki te Atua; whakamana hoki au kupu taurangi ki te Runga Rawa.

A karanga ki ahau i te ra o te he: maku koe e whakaora, a ka whakakororiatia ahau e koe.

¶ Ki te tangata hara ia ka mea te Atua, He aha mau te whakapuaki i aku tikanga, te whakahua ranei i taku kawenata e tou mangai?

Kua kino nei hoki koe ki te ako, a e akiri ana i aku kupu ki muri i a koe.

I tou kitenga i te tahae, na whakaae ana koe ki a ia; a whai tahi ana me te hunga puremu.

Kua tukua e koe tou mangai ki te kino; a e tito hianga ana tou arero.

Noho ana koe, ka korero kino ki tou teina: ngautuara tonu iho koe ki te tama a tou whaea.

Ko au mahi enei, a wahangu tonu ahau; i mea koe he pena pu ahau me koe: otira ka riria koe e ahau, ka whakararangitia ano aua mea ki tou aroaro.

Na whakaaroa tenei, e te hunga kua wareware ki te Atua; kei haehaea koutou e ahau, a kahore he kaiwhakaora.

Ko te whakamoemiti te patunga tapu e whai kororia ai ahau: ko te tangata hoki he tika nei tona ara ka whakakitea e ahau ki a ia te whakaoranga a te Atua.

Te Timatanga o te Inoi

Te Waiata o te Hāora Tuaono o te rā manaakitia, ka tukuna e au ki a te Karaiti tōku Kīngi, tōku Atua, ā ka inoi au kia murua āku hara.

Waiata 53

¶ Ki te tino kaiwhakatangi. Maharata. He Makiri, na Rawiri. Kua ki te wairangi i roto i tona ngakau, Kahore he Atua. Kua pirau ratou, he kino whakahouhou ta ratou mahi; kahore tetahi e mahi ana i te pai.

I titiro iho te Atua i te rangi ki nga tama a te tangata, kia kite me kahore tetahi e mahara ana, e rapu ana i te Atua.

Kua hoki ki muri ratou katoa, kua pirau tahi: kahore tetahi e mahi ana i te pai, kahore kia kotahi.

E kore ranei e mohio nga kaimahi i te kino? e kai nei i toku iwi, me te mea e kai taro ana; a kahore e karanga ki te Atua.

Wehi noa iho ratou i reira, i te wahi kahore he wehi, no te mea kua titaria e te Atua nga wheua o te tangata i whakapaea ai koe: kua whakama ratou i a koe; no te mea kua whakahaweatia ratou e te Atua

Aue, me i puta mai te whakaoranga o Iharaira i Hiona! Kia whakahokia mai e te Atua tana iwi i te whakarau, ka whakamanamana a Hakopa, ka hari a Iharaira.

Waiata 56

¶ Ki te tino kaiwhakatangi. Ionata ereme rehokime. Na Rawiri. He Mikitama, i a ia ka mau i nga Pirihitini ki Kata. Tohungia ahau e te Atua, ka horomia hoki ahau e te tangata: e tukino ana ia ki ahau i te ra roa nei, i a ia e ngangare tonu nei.

E whai ana oku hoariri i te ra roa nei, kia horomia ahau; he tokomaha nei hoki e whakahi ana, e whawhai mai ana ki ahau.

Ka whakawhirinaki ahau ki a koe i te wa e mataku ai ahau.

Ma te Atua ahau ka whakamoemiti ki tana kupu: e whakawhirinaki ana ahau ki te Atua, e kore ahau e wehi. He aha ta te kikokiko e mea ai ki ahau?

E whakariroia ketia ana e ratou aku kupu i nga ra katoa; heoi ano ta ratou e whakaaro ai ko te kino moku.

E huihui ana ratou, e piri ana: e titiro matatau ana ki oku hikoinga, i a ratou e whanga nei ki toku wairua.

Ma te he koia ratou ka mawhiti ai? kia riri koe, e te Atua, whakataka iho hoki nga iwi.

¶ E taua ana e koe oku kopikopikotanga: rongoatia oku roimata ki roto ki tau ipu: kahore ianei i tau pukapuka?

I te ra e karanga ai ahau ka hoki whakamuri oku hoariri: e matau ana ahau ki tenei, kei ahau hoki te Atua.

Ma te Atua ahau ka whakamoemiti ai ki tana kupu; ma Ihowa ahau ka whakamoemiti ai ki tana kupu.

E whakawhirinaki ana ahau ki te Atua: e kore ahau e wehi. He aha ta te tangata e mea ai ki ahau?

Kei ahau nga kupu taurangi ki a koe, e te Atua: me tuku e ahau nga whakamoemiti ki a koe.

Nau hoki toku wairua i whakaora kei mata: e kore ianei koe e whakau i oku waewae kei paheke, kia haere ai ahau i te aroaro o te Atua i roto i te marama o te hunga ora.

Waiata 60

¶ Ki te tino kaiwhakatangi. Huhana Erutu. He Mikitama, na Rawiri, hei whakaako. No tana whawhaitanga ki a Aramanaharaima raua ko Aramatopa. Na hoki ana a Ioapa, a patua ana e ia a Eroma ki te Raorao Tote, kotahi tekau ma rua mano. E te Atua, kua pa nga matou e koe, kua oti matou te whakamarara e koe, kua riri koe; tahuri mai ano ki a matou.

Wiri ana te whenua i a koe: kua ngatata i a koe: whakakapia ona wahi pakaru; e ru ana hoki.

He mea pakeke kua whakakitea e koe ki tau iwi, kua oti matou te whakainu e koe ki te waina e wiri ai.

Kua homai e koe he kara ki te hunga e wehi ana i a koe: kia whakakitea hei mea mo te pono. (Hera.

Hei mea e mawhiti ai au e aroha ai: ma tou matau e whakaora, whakahokia mai hoki he kupu ki ahau.

¶ Kua korero te Atua i runga i tona tapu; ka hari ahau, ka kotikoti i Hekeme, ka roherohe hoki i te raorao o Hukota.

Noku Kireara, noku ano a Manahi, ko Eparaima ano hoki te kaha o toku matenga; ko Hura taku kaiwhakatakoto ture;

Ko Moapa taku oko horoi; ka maka e ahau toku hu ki runga ki Eroma: e Pirihitia, ko ahau hei whakamanamana mau.

Ma wai ahau e kawe ki te pa kaha? Na wai ahau i arahi ki Eroma?

He teka ranei, e te Atua, kua panga matou e koe? kahore hoki koe, e te Atua, e haere tahi me a matou taua.

Homai he awhina mo matou ki o matou hoariri: he teka noa hoki te awhina a te tangata.

Ma te Atua tatou ka toa ai: mana hoki e takahi ki raro o tatou hoa whawhai.

Waiata 62

¶ Ki te tino kaiwhakatangi, ki a Ierutonu. He himene na Rawiri. Ko te Atua anake taku e tatari nei: kei a ia te whakaoranga moku.

Ko ia anake toku kohatu, toku whakaoranga, toku pa hoki, e kore e nui toku ngaueuetanga.

Kia pehea te roa o ta koutou tatau ki te tangata, kia whakamatea ai e koutou, e koutou katoa, ka rite ki te taiepa e tungou ana, ki te wawa ka tata te hinga?

Heoi ano ta ratou e runanga ai ko te turaki i a ia i tona wahi teitei: e ahuareka ana ki te teka; e manaaki ana o ratou mangai, a e kanga ana a roto i a ratou. (Hera.

Tatari, e toku wairua, ki te Atua anaki; ko ia taku e tumanako nei.

Ko ia anake toku kohatu, toku whakaoranga, toku pa hoki; e kore ahau e whakangaueuetia.

Kei te Atua te whakaoranga moku, te kororia ano moku; kei te Atua te kohatu o toku kaha, toku piringa.

¶ Whakawhirinaki ki a ia i nga wa katoa, e te iwi, ringihia to koutou ngakau ki tona aroaro: hei piringa mo tatou te Atua (Hera.

He pono he mea memeha noa nga ware, he teka noa nga rangatira; ki te paunatia ratou, mama noa ake ratou tahi i te horihori.

Kaua e whakawhirinaki ki te tukino, kei wairangi hoki ki te pahua: ki te tini haere nga taonga, kei whakamanawa to koutou ngakau ki reira.

Kotahi korerotanga a te Atua, ka rua oku rongonga i tenei, no te Atua te kaha.

Nau ano, e te Ariki, te mahi tohu: rite tonu hoki ki tana mahi tau utu ki te tangata.

Waiata 66

¶ Ki te tino kaiwhakatangi. He himene, he waiata. Hamama, e te whenua katoa, ki te Atua:

Himenetia te kororia o tona ingoa, kia whai kororia te whakamoemiti ki a ia.

Mea atu ki te Atua, Ano te wehi o au mahi! Ma te nui o tou kaha e ngohengohe ai ou hoariri ki a koe.

E koropiko katoa te whenua ki a koe; ka himene ki a koe; ka himene ratou ki tou ingoa. (Hera.

Haere mai kia kite i nga mahi a te Atua: mataku rawa tana mahi ki nga tama a te tangata.

Nana i mea te moana hei tuawhenua: haere a waewae ana ratou ra roto i te awa; hari ana matou ki a ia i reira.

Ko tona kawanatanga tuturu tonu i runga i tona kaha; e titiro ana ona kanohi ki nga tauiwi; kei whakakake te hunga tutu. (Hera.

¶ Whakapaingia to tatou Atua, e nga iwi; kia rangona te reo whakamoemiti ki a ia.

Nana nei hoki i mau ai to tatou wairua ki te ora, kahore hoki e tukua e ia o tatou waewae kia nekehia.

Kua whakamatauria hoki matou e koe, e te Atua: whakarewaia ana matou e koe, ano he hiriwa e whakarewaia ana.

Kua kawea nei matou e koe ki roto ki te kupenga: whakapikaua ana e koe te mea whakamamae ki o matou hope.

I meinga ano e koe o matou upoko kia ekengia hoihotia e te tangata; i ra roto matou i te kapura, i te wai: heoi whakaputaina mai ana matou e koe ki te wahi momona.

¶ Ka tomo ahau me nga tahunga tinana ki tou whare; ka whakamana ahau i aku kupu taurangi ki a koe,

Era i puaki i oku ngutu, i korerotia e toku mangai i ahau e pouri ana.

Ka whakaekea e ahau mau nga mea momona hei tahunga tinana, ngatahi ano me te mea kakara o nga hipi toa; ka tukua e ahau he puru, he koati. (Hera.

Haere mai, whakarongo, e koutou katoa e wehi ana ki te Atua, a maku e whakapuaki tana i mea ai ki toku wairua.

I tangi toku mangai ki a ia: i whakanuia ano ia e toku arero.

Ki te whakaaroa e toku ngakau te he, e kore te Ariki e whakarongo mai.

Nei ra he pono kua whakarongo te Atua, kua tahuri ia ki toku reo inoi.

Kia whakapaingia te Atua, kihai nei i whakapeau ke i taku inoi, i tana atawhai hoki ki ahau.

Waiata 69

¶ Ki te tino kaiwhakatangi. Hohanimi. Na Rawiri. Whakaorangia ahau e te Atua, ka tae mai hoki nga wai ki roto ki toku wairua.

Ka tapoko ahau ki te oru hohonu, ki te wahi kahore nei he tunga: kua tae ahau ki nga wai hohonu, ngaro iho ahau i nga waipuke.

Kua ruwha ahau i taku tangi; kua maroke toku korokoro: pakoko kau oku kanohi i ahau e tatari nei ki toku Atua.

Tini ke i nga makawe o toku matenga te hunga e kino noa ana ki ahau: he kaha rawa te hunga e mauahara noa ana ki ahau, e mea nei kia whakamatea ahau; utua ana e ahau i reira nga mea kihai i tangohia e ahau.

E te Atua, e matau ana koe ki toku kuware; kahore hoki oku he e ngaro i a koe.

E te Ariki, e Ihowa o nga mano kaua te hunga e tatari ana ki a koe e whakama i ahau: e te Atua o Iharaira, kei numinumi kau i ahau te hunga e rapu ana i a koe.

Mou hoki ahau i waiho ai hei tawainga: ngaro iho toku mata i te whakama.

He tangata ke ahau ki oku hoa ake: hei tautangata ki nga tama a toku whaea.

Ka pau hoki ahau i te aroha ki tou whare: kua tau ano ki ahau nga tawai a te hunga e tawai ana ki a koe.

I ahau i tangi, i whakatiki hei whiu i toku wairua, ka waiho tena hei tawainga moku.

I kakahu hoki ahau i te kakahu taratara moku, a i waiho hei whakatauki ma ratou.

Kei te korero kino moku te hunga e noho ana i te kuwaha: waiatatia ana ahau e te hunga haurangi waina.

¶ Ko ahau ia, ki a koe taku inoi, e Ihowa, i te wa e manakohia ai: whakahokia mai he kupu ki ahau, e te Atua, i runga i te nui o tou aroha, o te pono o tau whakaoranga.

Whakaorangia ahau i roto i te oru, kei toremi: kia ora ahau i te hunga e kino ana ki ahau, i nga wai hohonu ano hoki.

Kei ngaro ahau i te waipuke, kei horomia e te rire; kei kopia ano te waha o te poka ki runga ki ahau.

E Ihowa whakahokia mai he kupu ki ahau; he pai hoki tou atawhai: tahuri mai ki ahau, kia rite ki te nui o au arohatanga.

A kaua e huna tou mata ki tau pononga; e pouri ana hoki ahau: hohoro te whakahoki kupu mai ki ahau.

Whakatata mai ki toku wairua, hokona: whakaorangia ahau, e mahi nei oku hoariri.

E matau ana koe ki toku tawainga, ki toku whakama, ki toku numinumi: kei tou aroaro oku hoariri katoa.

Maru noa toku ngakau i te tawai; a ki tonu ahau i te pouri: i titiro ahau ki tetahi hei aroha mai, a kore ake; ki etahi hei whakamarie, a kihai i kitea.

I homai he au hei kai maku: i toku matewaitanga ano i whakainumia ahau ki te winika.

¶ Kia meinga ta ratou tepu i to ratou aroaro hei mahanga; hei rore hoki i to ratou wa rangimarie.

Kia whakapouritia o ratou kanohi, kei kite ratou: kia wiri tonu hoki o ratou hope.

Ringihia atu tou riri ki runga ki a ratou, kia mau hoki ratou i tou arita, i tou weriweri.

Kia ururuatia to ratou nohoanga: kaua tetahi e noho ki o ratou teneti.

Mo ratou i tukino i te tangata i whiua nei e koe; a korerotia ana e ratou te pouri o te hunga i werohia e koe.

Tapiritia he kino ki runga ki to ratou kino; kaua hoki ratou e tukua kia tomo ki tou tika.

Kia murua atu ratou i te pukapuka o te ora, kaua ano e tuhituhia ki roto ki te hunga tika.

Ko ahau ia, he rawakore, he pouri; kia whakateiteitia ake ahau, e te Atua, e tau whakaoranga.

¶ Ka whakamoemiti taku waiata ki te ingoa o te Atua, ka whakanui ano taku whakawhetai i a ia.

Pai rawa tenei ki a Ihowa i te puru i te kau, i te mea whai haona, whai maikuku.

Kua kite te hunga mahaki, kua hari: ka ora ano o koutou ngakau, e te hunga e rapu nei i te Atua.

No te mea ka rongo a Ihowa ki nga rawakore, e kore ano e whakahawea ki ana herehere.

Kia whakamoemiti te rangi me te whenua ki a ia, nga moana, me nga mea katoa e tere ana i roto.

No te mea tera e whakaorangia e te Atua a Hiona, ka hanga ano e ia nga pa o Hura; a ka noho ratou ki reira, ka riro hoki a reira i a ratou.

A ka nohoia a reira e nga uri o ana pononga: hei kainga tupu ano a reira mo te hunga e aroha ana ki tona ingoa.

Waiata 83

¶ He waiata, he himene, na Ahapa. E te Atua, kei wahangu koe, kei whakarongo puku, kei ata noho, e te Atua.

He mea hoki, tenei ou hoariri te ngangau nei, a kua ara nga matenga o te hunga e kino ana ki a koe.

Kua ata ngarahu ratou ki tau iwi, e whakatakoto korero ana hoki ratou mo au mea huna.

Kua mea nei ratou, Tena, tatou ka huna i a ratou, kia kore ai tena iwi; kia kaua ai hoki e maharatia te ingoa o Iharaira a muri ake nei.

Kua kotahi to ratou ngakau i a ratou e runanga ana: kua whakatakoto ratou he tikanga kino ki a koe;

Ko nga teneti o Eroma, o nga Ihimaeri, o Moapa, o nga Hakarini;

A Kepara, a Amona, a Amareke, nga Pirihitini, me nga tangata o Taira:

Kua uru hoki a Ahiria ki roto ki a ratou; kua awhinatia e ratou nga tamariki a Rota. (Hera.

¶ Peratia ratou me Miriana: me Hihera, me Iapini, i te awa i Kihona:

I mate nei ki Eneroro, i waiho nei hei whakawairakau mo te whenua.

Kia rite o ratou rangatira ki a Orepe raua ko Teepe, ae, o ratou ariki katoa hoki ki a Tepa raua ko Taramuna;

Mo ratou i mea, Tatou ka tango i nga kainga o te Atua mo tatou.

E toku Atua, meinga ratou kia rite ki te awhiowhio puehu, ki te papapa e puhia ana e te hau.

Kia rite ki te ahi e kai ana i te ngahere, ki te mura hoki e toro ai nga maunga;

Kia pera te whai o tau awha i a ratou, tau whakaohorere hoki i a ratou ki tau paroro.

Whakakiia o ratou kanohi ki te whakama: kia rapu ai ratou ki tou ingoa, e Ihowa.

Kia whakama, kia ohorere ratou ake ake; ae, kia numinumi ratou, kia ngaro hoki.

Kia matau ai ratou, ko koe anake, ko Ihowa nei tou ingoa, te Runga Rawa i te whenua katoa.

Waiata 84

¶ Ki te tino kaiwhakatangi. Kititi. He himene ma nga tama a Koraha. Ano te ataahua o ou tapenakara, e Ihowa o nga mano!

E hiahia ana toku wairua, ae, e hemo ana ki nga marae o Ihowa: e tangi ana toku ngakau me oku kikokiko ki te Atua ora.

Me te pihoihoi hoki kua kite i tetahi whare, me te warou ano hoki i tetahi ohanga mona, hei takotoranga mo ana pi, ara i au aata, e Ihowa o nga mano, e toku Kingi, e toku Atua.

Ka hari te hunga e noho ana i tou whare: he whakamoemiti tonu ta ratou ki a koe. (Hera.

Ka hari te tangata ko tona kaha nei kei a koe: kei roto i o ratou ngakau nga huarahi ki reira.

Ka haere ratou ra te raorao o Paka, ka meinga e ratou hei puna: ngaro iho ano hoki nga poka i te ua.

Ka haere atu ratou i te kaha ki te kaha; ka kitea ratou ki te aroaro o te Atua i Hiona.

¶ E Ihowa, e te Atua o nga mano, whakarongo ki taku inoi: tahuri mai tou taringa, e te Atua o Hakopa. (Hera.

Titiro mai, e te Atua, e to matou whakangungu rakau: tirohia iho hoki te mata o tau tangata i whakawahi ai.

No te mea, he ra kotahi i ou whare, pai atu i nga ra kotahi mano: te tiaki tatau i te whare o toku Atua, pai atu ki ahau i te noho ki nga teneti o te kino.

He ra hoki a Ihowa te Atua, he whakangungu rakau: ka homai e Ihowa te atawhai me te kororia; e kore e kaiponuhia e ia tetahi mea pai ki te hunga e tapatahi ana te haere.

E Ihowa o nga mano, ka hari te tangata e whakawhirinaki ana ki a koe.

Waiata 85

¶ Ki te tino kaiwhakatangi. He himene ma nga tama a Koraha. E Ihowa, kua aro mai koe ki tou whenua, kua whakahokia mai e koe a Hakopa i te whakarau.

Kua murua e koe te kino o tau iwi, kua hipokina e koe o ratou hara katoa (Hera.

Kua mutu katoa tou weriweri; kua tahuri ke koe i te aritarita o tou riri.

Whakahokia ake matou, e te Atua o to matou whakaoranga: meinga hoki kia mutu tou riri ki a matou.

E riri ranei koe ki a matou ake ake? E mauahara tonu ranei, ki nga whakatupuranga katoa?

E kore ianei koe e whakahoki ake i a matou ki te ora: kia hari ai tau iwi ki a koe?

E Ihowa, whakakitea mai tau mahi tohu ki a matou: tukua mai ki a matou tau whakaoranga.

¶ Ka whakarongo ahau ki ta te Atua, ki ta Ihowa, e korero ai: no te mea mo te rongo mau ana korero ki tana iwi, ki tana hunga tapu hoki; kaua ia ratou e hoki ki te wairangi.

Ina, he tata tonu tana whakaoranga ki te hunga e wehi ana ki a ia, kia noho ai te kororia ki to tatou whenua.

Kua tutaki te mahi tohu raua ko te pono: kua kihi ki a raua te tika me te rongo mau.

Ka tupu ake te pono i te whenua, a ka titiro iho te tika i te rangi.

Ae, ka homai e Ihowa te pai: a ka tukua mai ona hua e to tatou whenua.

Ka haere te tika i mua i a ia, hei whakatu i a tatou ki te ara o ona hikoinga.

Waiata 86

¶ He inoi na Rawiri. Whakatitahatia iho tou taringa, e Ihowa whakahokia mai he kupu ki ahau; he ware hoki ahau, he rawakore.

Tiakina toku wairua: he tapu hoki ahau; mau, e toku Atua, e whakaora tau pononga e whakawhirinaki atu nei ki a koe.

Tohungia ahau, e te Ariki: e karanga nei hoki ahau ki a koe i te ra roa nei.

Whakaharitia te wairua o tau pononga; ka ara atu nei hoki toku wairua, e te Ariki, ki a koe.

He pai hoki koe, e te Ariki, he ngawari: e ranea ana hoki tau mahi tohu ki te hunga katoa e karanga ana ki a koe.

Tahuri mai tou taringa, e Ihowa, ki taku inoi: whakarongo kitoku reo unene.

Ka karanga ahau ki a koe i te ra o toku pouri: e whakahoki kupu mai hoki koe ki ahau.

¶ Kahore he rite mou, e te Ariki, i roto i nga atua: kahore hoki he rite mo au mahi.

Ka haere mai nga iwi katoa i hanga e koe, a ka koropiko ki tou aroaro, e te Ariki; ka whakakororia hoki i tou ingoa.

He nui hoki koe, e mahi ana i nga mea whakamiharo: ko koe anake te Atua.

Whakaakona ahau ki tau ara, e Ihowa; ka haere ahau i runga i tou pono: whakatapatahitia toku ngakau ki te wehi i tou ingoa.

Ka whakamoemiti katoa toku ngakau ki a koe, e te Ariki, e toku Atua: ka whakakororia ano i tou ingoa ake ake.

He nui hoki tau mahi tohu ki ahau: a kua whakaorangia e koe toku wairua i te reinga i raro riro.

E te Atua, kua whakatika ki ahau te hunga whakakake: kua whaia ano toku wairua e te huihuinga o te hunga tutu; kahore hoki koe e waiho i to ratou aroaro.

Ko koe ia, e te Ariki, he Atua atawhai, he tohu tangata: he puhoi ki te riri, e hua ana te mahi tohu me te pono.

Tahuri mai ki ahau, tohungia hoki ahau: homai tou kaha ki tau pononga, whakaorangia te tama a tau pononga wahine.

Whakakitea mai ki ahau he tohu mo te pai: kia kite ai te hunga e kino ana ki ahau, kia whakama ai: nou e Ihowa i awhina i ahau, i whakamarie i ahau.

Waiata 90

¶ He inoi na Mohi, na te tangata a te Atua. E te Ariki, ko koe to matou nohoanga i nga whakatupuranga katoa.

Kahore ano i whanau noa nga maunga, kahore i hanga e koe te whenua me te ao, ko koe te Atua no tua whakarere a ake tonu atu.

E whakahokia ana e koe te tangata kia mongamonga noa, a e mea ana, E hoki, e nga tama a te tangata.

Ki tau titiro hoki, he rite nga tau kotahi mano ki te ra onanahi, kua pahure atu nei, ki te mataaratanga hoki i te po.

Me te mea na te waipuke tau kahakinga i a ratou; he moe ratou: i te ata ano he tarutaru e tupu ana.

I te ata e tupu ana, e pihi ana: i te ahiahi kua kotia, kua maroke.

¶ Kua hemo nei hoki matou i tou riri: ka ohorere hoki i tou aritatanga.

Kua maka e koe o matou kino ki tou aroaro, o matou mea huna ki te marama o tou mata.

Ka pau o matou ra katoa, me te riri ano koe: hemo ake o matou tau ano he korero e korerotia ana.

Ko nga ra o o matou tau e whitu tekau tau; a ki te whai kaha, ka waru tekau tau; heoi he mahi mauiui, he pouri to ratou kaha; ka hohoro hoki te hatepea atu, a ka rere atu matou.

Ko wai te matau ana ki te kaha o tou riri? Rite pu ki te wehi ki a koe tou riri.

¶ Akona matou ki te tatau i o matou ra, kia anga ai te ngakau ki te whakaaro.

Hoki mai, e Ihowa, kia pehea ake te roa? A kia puta ke he whakaaro mou ki au pononga.

Kia na matou i te ata i tau mahi tohu: kia hari ai matou, kia koa ai, i o matou ra katoa.

Whakaharitia matou, kia rite ki nga ra i whakawhiua ai matou e koe, ki nga tau i kite ai matou i te kino.

Kia puta mai tau mahi ki au pononga, me tou kororia ki a ratou tamariki.

A hei runga i a matou te ataahua o Ihowa, o to matou Atua: whakapumautia ano ki a matou te mahi a o matou ringa, ae ra, te mahi a o matou ringa, whakapumautia e koe.

Waiata 92

¶ He himene, he waiata mo te ra Hapati. He mea pai te whakawhetai ki a Ihowa, te himene atu ki tou ingoa, e te Runga Rawa:

Te whakakite i tou atawhai i te ata, i tou pono i nga po katoa;

I runga i te aho tekau, i te hatere; i te tangi huatau a te hapa.

Nau hoki ahau, e Ihowa, i whakahari ki tau mahi: ka whakamanamana ahau ki nga meatanga a ou ringa.

Ano te nui o au mahi, e Ihowa! hohonu rawa ou whakaaro.

Ko te tangata poauau, kahore ia e matau; kahore hoki tenei e mohiotia e te kuware.

¶ Kia pihi ake nga whakaarokore ano he tarutaru, a kia tupu nga kaimahi katoa i te kino; he ngaromanga tena no ratou ake ake;

Ko koe ia, e Ihowa, kei runga rawa ake ake.

Na, ko ou hoa whawhai, e Ihowa, na, ko ou hoa whawhai, ka ngaro; ka marara katoa nga kaimahi i te kino.

Otira ka ara i a koe toku haona, ka pera i to te kau maka: ka whakawahia ahau ki te hinu hou.

Ka kite hoki toku kanohi i taku i hiahia ai ki runga ki oku hoariri, ka rongo oku taringa i taku i hiahia ai o te hunga kino e whakatika ana mai ki ahau.

Ka rite te tupu o te tangata tika ki to te nikau; ka rite tona nui ki to te hita i Repanona.

Ko te hunga i whakatokia ki te whare o Ihowa ka tupu ki nga marae o to tatou Atua.

Ka whai hua tonu ratou ua hina: ki tonu i te wai, matomato tonu;

Hei whakakite i te tika o Ihowa: ko ia toku kohatu, kahore hoki ona he.

TE RONGOPAI TAPU A MATIU (5:1–16)

¶ A, i tona kitenga i te whakaminenga, ka haere ia ki runga ki te maunga: a, no ka noho ia, ka haere ana akonga ki a ia:

Na ka puaki tona mangai, a ka whakaako ia i a ratou, ka mea,

¶ Ka koa te hunga he rawakore nei te wairua: no ratou hoki te rangatiratanga o te rangi.

Ka koa te hunga e tangi ana: ka whakamarietia hoki ratou.

Ka koa te hunga ngakau mahaki: ka riro hoki i a ratou te whenua.

Ka koa te hunga e hiakai ana, e hiainu ana, ki te tika: e makona hoki ratou.

Ka koa te hunga tohu tangata: e tohungia hoki ratou.

Ka koa te hunga ngakau ma: e kite hoki ratou i te Atua.

Ka koa te hunga hohou rongo: ka huaina hoki ratou he tamariki na te Atua.

Ka koa te hunga e whakatoia ana mo te tika: no ratou hoki te rangatiratanga o te rangi.

Ka koa koutou ina tawai ratou i a koutou, ina whakatoi, ina puaki i a ratou nga kupu kino katoa mo koutou, he mea teka, he whakaaro hoki ki ahau.

Kia hari, kia whakamanamana: he rahi hoki te utu mo koutou i te rangi: he penei hoki ta ratou whakatoi i nga poropiti i mua i a koutou.

¶ Ko koutou te tote o te whenua: otira ki te hemo te ha o te tote, ma te aha e whai tikanga tote ai? heoi ano tona painga, na ka akiritia ki waho, ka takahia e nga tangata.

Ko koutou te whakamarama o te ao. E kore e ngaro te pa e tu ana i runga maunga.

E kore hoki e tahuna te rama, e whakaturia ki raro o te mehua, engari ki runga ki te turanga; a ka tiaho ki nga tangata katoa i roto i te whare.

Waihoki kia tiaho to koutou marama ki te aroaro o nga tangata, kia kite ai ratou i a koutou hanga pai, kia whakakororia ai i to koutou Matua i te rangi.

Tenoo oasht emmok o piekhristos nem pekyot en aghathos nem pi epnevma ethowab je akee ak soati emmon nai nan

Ka koropiko mātou ki a Koe, e te Karaiti, me tō Matua Pai, me te Wairua Tapu; nāu hoki i haere mai, i whakaora i a mātou.

1. E Koe i whakapiria ki te ripeka i te rā tuaono, i te haora tuaono, mō te hara i māia ai tō mātou matua a Ārama ki te mahi i te Pararaiha; wawahia atu te pukapuka nama o ō mātou hara, e te Karaiti, tō mātou Atua, ā, whakaorangia mātou. I karanga ahau ki te Ariki, ā, rongo mai ana ia ki ahau. E te Atua, whakarongo ki taku inoi, kaua e paopao i taku tono. Kia mataara mai, ā, whakarongo mai ki ahau, i te ahiahi, i te ata, i te poutūmārō, ka kōrero ahau, ā, ka rongo ia ki taku reo, ka whakaora i tōku wairua i te rangimārie.

Doxa Patri ke Eioa ke Agio Pnevmati

Korōria ki te Matua, ki te Tama, ki te Wairua Tapu.

2. E Īhu Karaiti, tō mātou Atua, i whakapiria ki te ripeka i te haora tuaono, ā, nā te rākau i whakamatea te hara; nā tōu matenga i whakahoki ki te ora te tangata i hanga e ō Ringaringa, i mate rā i te hara. Whakamatengia ō mātou mamae e ōu mamaetanga whakaora, ā, mā ngā whao i whao ai Koe, whakaorangia ō mātou hinengaro i te rangirua o ngā mahi o te ao me ngā hiahia o te ao, kia mahara ki āu whakahau o te rangi, i runga i tōu aroha.

Ke nin ke a ee ke ees toos e onas toan e oa noan ameen.

Ināianei, ā, ake ake tonu atu, Āmine.

3. Kāore ō mātou tikanga pai, kāore he kupu whakaruruhau, kāore he whakatika, nā te tini o ō mātou hara; nā reira, māu mātou e kawe atu ki a Ia i whānau mai i a koe, e te Whaea o te Atua, e te Puwaru; he nui, he manakohia hoki tōu inoi tāpae ki tō mātou Kaiwhakaora. E te whaea mā, kaua e pana atu i te hunga hara i tōu inoi tāpae ki Tana i whānau mai i a koe; he atawhai hoki ia, he kaha ki te whakaora i a mātou, nō te mea i whakamamae ia mō mātou kia whakaorangia mātou. Kia wawe tō aroha ki te tae mai ki a mātou, kua tino whakaitia nei mātou. Āwhinatia mātou, e te Atua, tō mātou Kaiwhakaora, he korōria mō tōu ingoa. E te Ariki, whakaorangia mātou, ā, muru ō mātou hara mō tōu ingoa tapu.

Ke nin ke a ee ke ees toos e onas toan e oa noan ameen.

Ināianei, ā, ake ake tonu atu, Āmine.

4. I mahi ai Koe i te whakaoranga i waenganui i te whenua katoa, e te Karaiti, tō mātou Atua, i a Koe e toro ana ōu ringa tapu ki runga i te ripeka; nā reira ka karanga ngā iwi katoa, “Korōria ki a Koe, e te Ariki.”

Doxa Patri ke Eioa ke Agio Pnevmati

Korōria ki te Matua, ki te Tama, ki te Wairua Tapu.

5. Ka koropiko mātou ki tōu āhua e kore e pāngia e te pirau, e te Pai; ā, ka tono mō te murunga o ō mātou hara, e te Karaiti, tō mātou Atua. I runga i tōu hiahia, i whakaaetia e Koe kia hiki ake ki runga ki te ripeka, kia whakaorangia ai te hunga i hanga e Koe i te herehere a te hoariri. Ka karanga mātou ki a Koe, ka whakawhetai hoki ki a Koe, i te mea i whakakīa e Koe te ao katoa ki te hari, e te Kaiwhakaora, i tōu taenga mai hei āwhina i te ao. E te Ariki, korōria ki a Koe.

Ke nin ke a ee ke ees toos e onas toan e oa noan ameen.

Ināianei, ā, ake ake tonu atu, Āmine.

6. Ko koe te wahine kī i te aroha noa, e te Whaea o te Atua, e te Puwaru; ka whakamoemiti mātou ki a koe, nō te mea nā te ripeka o tō Tama, i hinga ai a Hēti, i whakakorea ai te mate. I mate mātou, engari kua whakaarahia ake, kua meinga hoki mātou kia tika mō te ora tonutanga, ā, kua whiwhi hoki ki te reka o te Pararaiha tuatahi. Nā tēnei, ka whakakorōria mātou me te whakawhetai ki a te Karaiti, tō mātou Atua e kore e mate.

Ka inoi te kai-inoi:

E te Ariki, whakarongo mai ki a mātou, kia aroha mai ki a mātou, ā, murua ō mātou hara. Āmine.

(E te Ariki, kia aroha mai) 41 ngā wā

Te Murunga Hara

Ka whakawhetai mātou ki a Koe, e tō mātou Kīngi, e te Kaha Rawa, te Matua o tō mātou Ariki, tō mātou Atua, tō mātou Kaiwhakaora, a Īhu Karaiti, ā ka whakakorōria hoki mātou i a Koe; nā te mea i meinga e Koe ngā wā o ngā mōrearea o tōu Tama kotahi hei wā whakamarietanga me te inoi. Whakaae ki ō mātou īnoi; ā, muku atu i a mātou te pukapuka o ō mātou hara kua tuhia ki runga i a mātou, pēnei i tāu i haehae ai i tēnei hāora tapu i runga i te Rīpeka o tōu Tama kotahi, a Īhu Karaiti tō mātou Ariki, tō mātou Kaiwhakaora; nāna hoki i turaki te kaha katoa o te hoariri.

Homai ki a mātou, e te Atua, he wā ātaahua, he oranga kāhore he hē, he oranga marino; kia manakoa ai tōu Ingoa Tapu e koropikoa ana; ā, kia tū mātou i mua i te torona whakawehi o te tika, o tōu Tama kotahi, a Īhu Karaiti tō mātou Ariki, me te kore he kōhuru; ā, kia whakakorōria mātou i a Koe me ō hunga tapu katoa. Ko Koe te Matua kāhore he tīmatanga, ā ko te Tama he ōrite ki a Koe, me te Wairua Tapu te Kai-homai i te ora, ināianei, ā i ngā wā katoa, ā, i ngā tau katoa o ngā tau katoa. Āmene.

He Inoi tono ka inoi i te mutunga o ia Hāora

Tohungia mātou, e te Atua, kātahi anō ka tohungia. E Koe e whakamoemititia ana, e whakakorōria ana i ngā wā katoa, i ia hāora, i te rangi, i te whenua, e te Karaiti tō mātou Atua pai, e manawanui ana, e nui ana te atawhai, e kī ana i te ngākau aroha; e aroha ana ki te hunga tika, e atawhai ana ki te hunga hara, ko au te tuatahi; e kore nei e hiahia kia mate te tangata hara, engari kia tahuri, kia ora; e karanga ana i te katoa ki te whakaoranga mō te oati o ngā mea pai e tatari ana.

E te Ariki, whakaaetia ō mātou inoi i tēnei hāora, i ia hāora. Whakawātea tō mātou oranga; arahina mātou kia mahia ōu whakahau. Whakatapua ō mātou wairua. Whakamāhorahoratanga ō mātou tinana. Whakatika ō mātou whakaaro. Whakapai ō mātou whakaaro huna. Whakaorangia ō mātou māuiui, ā, murua ō mātou hara. Whakaorangia mātou i ia pouri kino, i ia māharahara o te ngākau. Karapīpihia mātou e āu anahera tapu; kia tiakina, kia arahina mātou e tō rātou puni; kia tae atu mātou ki te kotahitanga o te whakapono, ki te mōhiotanga o tō korōria kāore e kitea, kāore e whāiti; he mea whakapaingia Koe ā ake ake. Āmene.

E te Atua, meinga mātou kia tika kia mea atu mātou me te whakawhetai: E tō mātou Matua i te rangi...