Pangaken Iman Ortodoks

Satemené kita pracaya marang siji Gusti Allah, Allah Sang Rama Kang Mahakuwasa, Kang nitahaké langit lan bumi sarta samubarang kang katon lan kang ora katon.

Kita pracaya marang siji Gusti, Yésus Kristus, Putra ontang-antingé Allah, miyos saka Sang Rama sadurungé sakèhing jaman. Pepadhang saka Pepadhang, Allah sejati saka Allah sejati; miyos, dudu katitahaké; nunggal hakikat karo Sang Rama; lumantar Panjenengané samubarang kabèh dumadi.

Kanggo kita manungsa lan kanggo kaslametan kita, Panjenengané tumurun saka swarga; njelma déning Roh Suci lan saka Prawan Maria, banjur dadi manungsa.

Panjenengané kasalib kanggo kita nalika Pontius Pilatus, nandhang sangsara lan kasarekaké; ing dina katelu wungu saka ing antarané wong mati kaya kang katulis ing Kitab Suci.

Panjenengané minggah menyang swarga lan lenggah ing tengené Sang Rama; bakal rawuh manèh kanthi kamulyan kanggo ngadili wong urip lan wong mati; Kratoné ora bakal ana entèké.

Ya, kita pracaya marang Roh Suci, Gusti kang maringi urip, kang metu saka Sang Rama; bebarengan karo Sang Rama lan Sang Putra disembah lan dimulyakaké; kang ngandika lumantar para nabi.

Lan marang Gréja siji, suci, katulik lan apostolik. Kita ngakoni siji baptis kanggo pangapuraning dosa.

Kita ngarep-arep tanginé wong mati lan urip ing jaman kang bakal teka. Amin.